यस्तो छ संसद् बैठकका कार्यसूची

काठमाडौं–संघीय संसदको प्रतिनिधिसभा बैठकमा बिहीबार सांसद खगराज अधिकारीले देशभर निर्माणाधीन अवस्थाका खानेपानी, सडक, ढल, पुलेसा, सिंचाई र अन्य आयोजना प्रदेश र स्थानीय तहलाई हस्तानान्तरणको व्यवस्था मिलाउन आवश्यक भएको जरुरी सार्वजनिक महत्वको प्रस्ताव प्रस्तुत गर्ने कार्यसूची रहेको छ । 

प्रस्तावमा सांसद विशाल भट्टराई र ध्रुवकुमार शाहीले समर्थन गर्ने संसद सचिवालयले जनाएको छ । 

त्यस्तै बैठकमा गृहमन्त्री रामबहादुर थापा बादलले राष्ट्रिय सभा सदस्य निर्वाचन विधेयक २०७५ लाई प्रस्तुत गर्न अनुमति माग्ने प्रस्ताव, राष्ट्रियसभा सदस्य निर्वाचन विधेयक २०७५ प्रस्तुत गर्ने कार्यसूची छ । 

त्यस्तै कानुन न्याय तथा संसदीय मामिला मन्त्री शेरबहादुर तामाङले संघीय संसदका महासचिव, प्रतिनिधिसभाका सचिव तथा राष्ट्रिय सभाका सचिवको पारिश्रमिक, सेवाको शर्त र सुविधा सम्बन्धि विधेयकमा विचार गरियो भन्ने प्रस्ताव प्रस्तुत गर्ने कार्यसूची रहेको सचिवालयका महासचिव मनोहरप्रसाद भट्टराईले जानकारी दिए । 

त्यस्तै बैठकमा प्रतिनिधिसभा नियमावली, २०७५ को नियम २५० को उपनियम (१) बमोजिम नियम निलम्बनको प्रस्ताव प्रस्तुत हुनेछ । 

विनियोजन विधेयकमाथिको जारी छलफलका क्रममा बिहीबार अर्थमन्त्रालयका विभिन्न शीर्षकमाथिको छलफलमा उृठेका प्रश्नहरुको अर्थमन्त्री डा युवराज खतिवडाले जवाफ दिने कार्यसूचि तय गरिएको संघीय संसद सचिवालयले जनाएको छ ।