काठमाडौं- बाजुरा र पोखरामा भएको छुट्टाछुट्टै दुर्घटनामा परी तीन जनाको ज्यान गएको छ भने सात जना घाइते भएका छन् ।
बाजुराको त्रिवेणी नगरपालिका-४ पिपलसैन नजिकै से १ ग ९९९ नम्बरको जीप दुर्घटनामा परी दुर्इ जनाको ज्यान गएको हो भने छ जना घाइते भएका छन्। मृत्यु हुनेमा त्रिबेणि नगरपालिका १ का वडाअध्यक्ष खम्म नेपाली र एकजना महिलाको रहेका छन् । महिलाको सनाखत हुन सकेको छैन ।
बाम्काबाट छतारा जानेक्रममा बुधबार बेलुका साढे ७ बजे जिप दुर्घटना भएको र उद्धार कार्य चलिरहेको बाजुराका प्रहरी नायब उपरीक्षक सागर बोहराले जानकारी दिए । घटनाबारे थप विवरण आउन बाँकी रहेको प्रहरी नायब उपरीक्षक बोहराले बताए।
त्यसैगरी पोखरा लेखनाथ महानगरपालिकाको मालेपाटन नजिकै विपरीत दिशाबाट आइरहेका मोटरसाइकल आपसमा ठोक्किँदा एक जनाको मृत्यु भएको छ भने एक जना घाइते भएका छन् । मृत्यु हुनेमा म्याग्दीकी वृन्दा आले रहेको कास्कीका प्रहरी प्रमुख प्रहरी उपरीक्षक ओम रानाले जानकारी दिए ।
उनका अनुसार बुधाबार बेलुका ७:३५ बजे पोखरा लेखनाथ महानगरपालिकाको ० किलोमिटरबाट पर्स्याङतर्फ गइरहेको मोटरसाइकल र पर्सायाङबाट ० किलोमिटरतीर गइरहेको मोटरसाइकल ठोक्किदा दुर्घटना भएको हो ।
मोटरसाइकलसँगै ट्याङ्कर आइरहेकोले दुर्घटना भइरहेको एसपी रानाले बताए।
प्रकाशित: Dec 31, 2017| 18:23 आइतबार, पुस १६, २०७४