जनकपुरधाम- प्रदेश नम्बर २ को स्थानीय तहका पदाधिकारी तथा सदस्यहरुले पाउने सुविधा सम्बन्धमा व्यवस्था गर्न बनेको विधेयक प्रदेशसभाको बैठकले पारित गरेको छ।
बुधबार बसेको प्रदेशसभा बैठकले स्थानीय तहका पदाधिकारी तथा सदस्यहरुको सुविधा तोक्न सरकारले पेश गरेको विधेयक पारित गरेको हो।
विधेयक पारित भएसंगै प्रदेश २ का महानगरपालिका प्रमुखले मासिक ४३ हजार ५ सय तलब, सञ्चार सुविधा वापत मासिक २ हजार, जिल्ला बाहिर दैनिक भ्रमण भत्ता २ हजार र विदेश भ्रमणको दैनिक भत्ता २ सय अमेरिकी डलर पाउने भएका छन्।
त्यसैगरी महानगरपालिकाका उपप्रमुखको मासिक तलब ४१ हजार ५ सय तोकिएको छ । उपप्रमुखलाई सञ्चार सुविधा मासिक २ हजार, दैनिक भ्रमण भत्ता २ हजार र विदेश भ्रमणमा दैनिक भत्ता १ सय ७५ अमेरिकी डलर दिइने छ।
प्रदेश २ ले महानगरपालिकाक वडा अध्यक्ष र कार्यपालिका सदस्यहरुको मासिक तलब २८ हजार तोकेको छ भने सभाका सदस्यहरुको मासिक तलब ७ हजार तय गरिएको छ । कार्यपालिका सदस्य र सभाका सदस्यहरुले सञ्चार सुविधा नपाउने भएका छन्।
प्रदेश सरकारले जिल्ला समन्वय समितिका प्रमुखहरुको तलब मासिक ४४ हजार, उपप्रमुखको ४२ हजार र सदस्यहरुको १० हजार मासिक तलब तोकेको छ। जिल्ला समन्वय समितिका अध्यक्षलाई सञ्चार सुविधा वापत २ हजार, उपप्रमुखलाई १ हजार ५ सय र सदस्यहरुलाई मासिक १ हजार उपलब्ध दिइने छ।
प्रदेश २ का उपमहानगरपालिका प्रमुखको ४१ हजार, उपप्रमुखको ३५ हजार र वडा अध्यक्ष तथा कार्यपालिका सदस्यहरुको मासिक तलब २५ हजार तोकिएको छ । उपमहानगरपालिका सभा सदस्यहरुको मासिक तलब ७ हजार तोकिएको छ।
नगरपालिकाका प्रमुखको मासिक तलब ३५ हजार, उपप्रमुखको ३१ हजार, वडा अध्यक्षको २२ हजार र कार्यपालिका सदस्यको २२ हजार तोकिएको छ भने सभाका सदस्यहरुले ७ हजार तलब पाउने भएका छन्।
यसैगरी गाउँपालिका अध्यक्षले ३१ हजार ५ सय, उपाध्यक्षले २७ हजार ५ सय, वडा अध्यक्षले २० हजार, कार्यपालिका सदस्यले २० हजार र सभाका सदस्यहरुले मासिक ७ सय पाउने भएका छन्।
प्रकाशित: Dec 31, 2017| 18:23 आइतबार, पुस १६, २०७४