सीताको  थप उपचारले प्रचण्डको सिंगापुर बसाई लम्बियो

काठमाडौ–नेपाल कम्युनिस्ट पार्टी (नेकपा)का अध्यक्ष पुष्पकमल दाहालको सिंगापुर बसाई एकसाता लम्बिने भएको छ । पत्नी सीतालाई अझै एक साता अस्पतालमा राखेर उपचार गर्नुपर्ने भएकाले प्रचण्डको सिंगापुर बसाई लम्बिएको हो । 

स्वास्थ्यमा समस्या आएपछि प्रचण्ड पत्नीलाई लिएर उपचारका लागि गत असार तीन गते राति प्रचण्ड दम्पती सिंगापुर गएको थियो । 

सिंगापुरको एमपी एलिजाबेथ अस्पतालमा सीताको स्वास्थ्य उपचार भइरहेको छ । पिता प्रचण्डसँगै सिंगापुर गएकी पूत्री गंगा मंगलबार स्वदेश फर्किएकी छिन् । 

स्वदेश फर्किएलगत्तै सामाजिक सञ्जालमार्फत गंगाले आमा सीताको अस्पतालमा वाटर थेरापी भइरहेको र चिकित्सकको निगरानीमा औषधी सेवन गर्ने काम जारी रहेको बताएकी छन् । 

‘ममिको उपचारका लागि सिंगापुर पुगेर नेपाल फर्किएको छु । वाटर थेरापी र डाक्टरको प्रत्यक्ष निगरानिमा औषधि सेवन गर्ने सल्लाह अनुसार अझै एक हप्ता त्यहीँ बसेर उपचार गर्ने र अहिले ममीको स्वास्थ्यमा निकै सुधार आएको छ । देशको राजनीति र व्यस्तताका बाबजूद पनि ममिको स्वास्थ्य र मनोविज्ञानलाई ख्याल गरेर बुवा उपचार सकेरै एक हप्तापछि नेपाल फर्कनु हुनेछ’, गंगाले फेसबुक वालमा लेखेकी छन् । 



उनले आफ्नी ममिको स्वास्थ्य र परिवारप्रतिको चिन्ता, चासो र शुभेच्छा राख्नुहुने सबैमा आभार व्यक्त गरेकी छन् । 

प्रचण्ड ८ असारमा फर्किने कार्यक्रम थियो।