काठमाडौं- युथ नर्स संजाल नेपालले मानवअंग प्रत्यारोपण केन्द्र हाल धर्मभक्त अंग प्रत्यारोपण केन्द्रमा नर्सहरु माथि अन्याय गरिएको अरोप लगाएको छ ।
रिपोर्टस क्लबमा मंगलबार आयोजित पत्रकार सम्मेलनमा केन्द्रमा भएको विकृतिबारे जानकारी दिँदै नर्सहरुले आफूहरुलाई शारीरिक र मानसिक यातना दिइने गरेको आरोप लगाए ।
पीडित नर्स त्रजिना जतीले भक्तपुरको दूधपाटीमा रहेको धर्मभक्त अंग प्रत्यारोपण केन्द्र प्रशासनले नर्सहरुमाथि सबै खाले शोषण गरेको आरोप लगाइन् ।
१८ महिनासम्म स्वयम् सेवकको रुपमा काम गरेका नर्सहरुलाई आन्तरिक प्रतिस्पर्धाबाट जागिर दिलाइयोस भन्ने माग राख्दा प्रशासनले दमन गर्न थालेको युथ नर्स संजाल नेपालकी अध्यक्ष सजना द्योलाले बताइन् ।
लामो समय स्वयम् सेवकको रुपमा काम लगाइएका नर्सहरुलाई जागिरको व्यवस्था गर्न आग्रह गरेका कारण शुरु भएको विवादले अहिले उग्र रुप लिएको छ ।
‘नर्सहरुप्रति गरिएको अभद्र व्यवहार, मानसिक यातना, कार्यस्थलमा हिंसा, कुटपिट जस्ता अपराध गर्ने गराउने व्यक्ति तथा संस्था र हकअधिकारको लागि पेशागत संघ संस्थाहरुबाट गरिएको अमानवीय चरित्र दमन, शोषण आरोप प्रत्यारोपको घोर भत्र्सना गर्दछौँ,’ युथ नर्स संजाल नेपालले जारी गरेको विज्ञप्तिमा भनिएको छ ।
आफ्ना समस्याबारे नेपाल नर्सिङ संघलाई जानकारी गराई समाधान गर्न आग्रह गर्दा पनि कुनै सुनुवाइ नभएको पत्रकार सम्मेलनमा सहभागि नर्सहरुको गुनासो छ । संघकी अध्यक्ष तारा पोखरेलले नर्सहरुलाई नै उल्टै अनावश्यक आरोप लगाएर थप पीडा दिएको नर्सहरुले बताएका छन् ।
समस्याका बारेमा स्वास्थ्य मन्त्रालयमासमेत औपचारिक रुपमा गुनासो गरिए पनि वेवास्ता गरिएको उनीहरुको दाबी छ ।
संघ र मन्त्रालय मिलेर उल्टै दोषीलाई उन्मुक्ति दिने र नर्सहरुलाई अन्यायमा पार्ने काम भएको युथ नर्स संजाल नेपालकी अध्यक्ष सजना द्योलाको आरोप छ ।
‘मैले गालामा झापडसमेत खानुपर्यो । मानसिक र शारीरिक रुपमा पीडा दिइयो । छानबिन गर्छु भनियो तर गरिएन,’ पीडित नर्स जतीले भनिन् ।
समस्या समाधान गर्नुको साँटो राजनीतिक रंग दिएर आफूहरुलाई भौतिक कारबाही गर्ने धम्की दिइएको उनको दाबी छ । जतिले भनिन्-‘मलाई अहिले लागिरहेको छ, किन यो पेशा रोजेँ । तर म हारेको छैन । न्याय नपाएसम्म लडिरहन्छु । मर्नतयार भइसकेको छु ।’
उनले नर्स पेशामा हुने गरेको सबैखाले विकृति र अन्यायको अन्त्य नभएसम्म लडाई जारी राख्ने बताएकी छिन् ।
जतीले रुँदै भनिन्, ‘म त पीडित भएँ । अब यो पेशाको सबै विकृति अन्त्य होस भनेर लडिरहेको छु । माग पूरा नभए आमरण अनशनमा बस्छौँ ।’
समस्याबारेमा नेपालनर्सिङ संघ पूर्ण रुपमा जानकार भए पनि माग पूरा गराउने सवालमा उल्टै नर्सहरुको विपक्षमा लागेको पीडित नर्सहरुले बताएका छन् ।
प्रकाशित: Dec 31, 2017| 18:23 आइतबार, पुस १६, २०७४