काठमाडौं- राजधानीबाट प्रकाशित सोमबारका राष्ट्रिय दैनिक पत्रिकाहरुले फरक–फरक विषयलाई पहिलो प्राथमिकतामा पारेका छन् ।
कसैले प्रधानमन्त्री केपी ओली ६ दिने चीन भ्रमण सकेर स्वदेश फर्किको विषयलाई मुख्य समाचार बनाएका छन् भने कसैले असारे विकासका कारण २ महिनाको खर्च ३ दिनमै सकेको विषयलाई पहिलो खबर बनाएका छन् ।
केहि पत्रपत्रिका एसईईको रिजल्टमा भएको त्रुटिका कारण दुई पटक नजिता प्रकाशन गर्दा हजारौं विद्यार्थीको नतिजा फेरिएको विषयलाई प्राथमिकतामा पारेका छन् ।
नागरिक दैनिक र कारोबारले प्रधानमन्त्री चीन भ्रमण सकेर स्वदेश फर्किएको विषयलाई मुख्य साचार बनाएका छन् । नागरिकले 'सी नेपाल आउन इच्छुक' शीर्षकमा खबर छापेको छ ।
उसले लेखेको छ–उत्तरी छिमेकी मुलुक चीन भ्रमण गरि आइतबार स्वदेश फर्किएका प्रधानमन्त्री केपी शर्मा ओलीले चिनियाँ राष्ट्रपति सी जिनपिङ नेपाल भ्रमण गर्न इच्छुक रहेको बताएका छन् । राष्ट्रपति सीको नेपाल भ्रमण चाँडै हुने अपेक्षा आफूले राखेको पनि उनले बताए ।
कारोबारले भने 'केरुङ–काठमाडौं रेलबारे प्रधानमन्त्री नै अस्पष्ट' शीर्षकमा खबर लेखेको छ ।
उले समाचारमा लेखेको छ – काठमाडौंसम्म चिनियाँ रेल ल्याउने प्रारम्भिक सहमति भए पनि यसमा लगानी कसले गर्ने र कहिलेसम्म निर्माण गरिसक्ने भन्नेमा झन अन्योल देखिएको छ । चिनियाँ रेलको चुनावी नाराले लोकप्रिय बनेका प्रधानमन्त्री केपी शर्मा ओली आफ्नो पुरानो अडानबाट पछाडी फर्केका छन् ।
हरेकजसो सार्वजनिक कार्यक्रममै दुई वर्षभित्र केरुङबाट काठमाडौंमा रेल ल्याउने अभिव्यक्ति दिँदै आएका ओली आइतबार स्वदेश फर्किने क्रममा विमानस्थलमा भने चिनियाँ रेलको सम्बन्धमा भने भावनात्मक कुरा गर्दै पन्छिए ।
आजको कान्तिपुरले भने असारे विकासको विकृत रुपलाई चित्रण गरेको छ । उसले 'असारे विकासः २ महिनाको खर्च ३ दिनमै' शीर्षकमा मुख्य समाचार छापेको छ ।
उसका अनुसार– सरकारले आर्थिक वर्षको सुरुवाती दुई महिनामा खर्च गरेजति बजेट असारको तीन दिनमै सकेको छ । महालेखा नियन्त्रकको कार्यालयका अनुसार चालु आर्थिक वर्षको दुई महिनामा (साउन र भदौ) सम्मको पुँजीगत खर्च ४ अर्ब २७ करोड १४ लाख १२ रुपैयाँ हो । आर्थिक वर्षको अन्तिम महिना असार लागे लगतैका तीन दिन ३,४ र ५ गतेको खर्च त्यो भन्दा बढि अर्थात ४ अर्ब ३७ करोड ७६ लाख रुपैयाँ सकिएको छ ।
यस्तै कान्तिपुरले २३ डेरीका दूधमा कोली फर्म भेटिएको विषयलाई पनि महत्वका साथ पहिलो पृष्ठमा छापेको छ । एसईई नजिजा दुई पटक प्रकाशित हुँदा २४ घण्टा पछि विद्यार्थीको नतिजा अर्कै हात परेको विषयलाई कान्तिपुर र नयाँ पत्रिकाले पहिलो पृष्ठमा स्थान दिएका छन् ।
अन्नपूर्ण पोस्टले भने द्वन्द्वकालीन घटनामा संलग्न पीडकको सजाय खुकुलो पार्दै सरकारले मेलमिलापमुखी कानुन ल्याउने तयारी गरेको विषयलाई मुख्य समाचार बनाएको छ । उसले उखु खरिद गरेपछि भुक्तानी नदिने उद्योगीलाई पक्राउ गर्न भनि गृहमन्त्रालयले दिएको आदेशलाई पनि प्राथमिकताका साथ छापेको छ।
प्रकाशित: Dec 31, 2017| 18:23 आइतबार, पुस १६, २०७४