रोकिएन टिपर आतंक, फेरि स्कुटर किच्यो

भक्तपुर- भक्तपुरको सानोठिमीमा टिपरको ठक्करबाट स्कुटर चालकको मृत्यु भएको छ ।

बा २ क ३९३४ नम्बरको टिपरले बा ६६ प ८५५३ नम्बरको स्कुटरलाई ठक्कर दिदा सानोठिमी बस्ने ४८ वर्षीय चेतबहादुर थापाको मृत्यु भएको प्रहरीले जनाएको छ ।

शुक्रबार बिहान सवा ५ बजे पेप्सीकोलाबाट भक्तपुरको अनुदान चोकतर्फ जाँदै गरेको स्कुटलाई टिपरले ठक्कर दिएको महानगरीय प्रहरी परिसर भक्तपुरले जनाएको छ ।

ठक्करबाट गम्भीर घाइते भएका उनको उपचारकै क्रममा ग्वार्कोस्थित बी.एण्ड.बी अस्पतालमा बिहान साढे ६ बजे मृत्यु भएको हो ।

टिपर र चालकलाई नियन्त्रणमा लिएर कारवाही प्रक्रिया अगाडि बढाइएको प्रहरीले जनाएको छ । मृतक थापाको स्थायी घर सिन्धुपाल्चोक सेलाङ ६ रहेको प्रहरीले बताएको छ । 

पछिल्लो एक महिनामा कोटेश्वर सुर्यविनायक सडकखण्डमा टिपरले ५ जनाको ज्यान लिएको छ ।

जेठ ३० गते कोटेश्वर जडिबुटीको आकाशेपुलमुनि टिपरको ठक्करबाट  स्कुटीको पछाडि बसेकी अस्मिता भण्डारीको मृत्यु भएका थियो । रौतहट घर भएकी तर हाल काभ्रे बस्दै आएकी २४ वर्षीया भण्डारी टिपरको ठक्करले गम्भीर घाइते भएलगत्तै मृत्यु भयो।

जेठ ९ गते नलिञ्चोकमा टिपरकै ठक्करले तीन जनाको ज्यान गयो । टिपरले ठक्कर दिँदा दोलखा घर भई लोकन्थली बस्ने ५० वर्षीय हरिबहादुर कटुवाल, ४० वर्षीय सविता घिमिरे र उनका छोरा १३ वर्षीय अविन्द्र घिमिरेको मृत्यु भएको थियो ।

टिपर र ट्रकहरूले सडक लेन मिचेर जथाभावी रूपमा चलाउने गरेकै कारण दुर्घटना बढेको विभिन्न अध्ययनहरुले देखाएका छन् । तर, ट्राफिक प्रहरी र सम्बन्धित निकायले कडा कारबाही गरेको पाइदैन् ।