यी हुन् नेपाल र चीनबीच सम्झौता भएका ९ विषय

काठमाडाैं- चीन भ्रमणमा रहेका प्रधानमन्त्री केपी शर्मा ओली र चिनियाँ राष्ट्रपतिबीच महत्वपूर्ण विषयमा सहमती भएको छ । बुधबार भएको द्विपक्षीय वार्तामा रेल र उर्जाका विषयमा महत्वपूर्ण समझदारी बनेको हो । 

भेटमा चिनियाँ राष्ट्रपति सीले चिनियाँ रेललाई नेपालका विभिन्न भागमा पुर्याउन सहयोग गर्ने प्रतिबद्धता जनाएका छन् । उनले अन्तरदेशीय रेलवे कनेक्टिभिटीलाई रुचिका साथ लिएको परराष्ट्रमन्त्री प्रदिप ज्ञवालीले जानकारी दिए । उनले नेपालको उर्जा विकासका लागि पनि चिनले सहयोग गर्ने बचन दिएका छन् ।  

चिनियाँ राष्ट्रपतिसंगको भेटपछि नेपाली प्रतिनिधि मण्डल र चीनका विभिन्न सरकारी निकाय तथा निजी क्षेत्रबीच ९ वटा सम्झौता तथा समझदारीपत्रमा हस्ताक्षर भएकाे छ ।

प्रधानमन्त्री केपी शर्मा ओलीको उपस्थितिमा बुधबार बेइजिङमा दुवै देशका पदाधिकारीले ती सम्झौता तथा समझदारीपत्रमा हस्ताक्षर गरेका हुन् । बिहीबार नेपाल–चीन द्विपक्षीय बैठकपछि थप सम्झौता तथा समझदारीपत्रमा हस्ताक्षर गरिनेछ ।

पहिलो सम्झौता नेपाल विद्युत् प्राधिकरण र चीनको स्टेट ग्रिड कर्पोरेसनबीच भएको छ । यो सम्झौता ‘नेपाल–चाइना क्रस–बोर्डर पावर ग्रिड इन्टरकनेक्सन प्रोजेक्ट’ को सम्भाव्यता अध्ययनका लागि गरिएको हो । 

दोस्रो सम्झौता नेपालको लगानी बोर्ड र हुसिन सिमेन्ट नारायाणी प्राइभेट लिमिटेडबीच भएको छ भने तेस्रो समझदारीपत्र (एमओयु) ऊर्जा, जलस्रोत र सिँचाइ मन्त्रालय र चाइना कम्युनिकेसन कन्स्ट्रक्सन कम्पनीबीच भएको छ ।

के के सम्झौता भयो ?

१. माथिल्लो मस्र्याङ्दी–२ आयोजना (६०० मेगावाट) निर्माण

२. कालीगण्डकी गर्ज आयोजना (१६४ मेगावाट) निर्माण

३. त्रिशूली–गल्छी आयोजना (७५ मेगावाट) निर्माण

४. सिउरी न्यादी जलविद्युत् आयोजना (४०.२७ मेगावाट) निर्माण

५. दैनिक ३ हजार मेट्रिक टन सिमेन्ट उत्पादन गर्ने उद्योग स्थापना

६. फलफूल प्रशोधन उद्योग स्थापना

७. नेपाली पस्मिना खरिद

८. पूर्वी तराईको सिँचाइ प्रणाली व्यवस्थित गर्न सहयोग

९. रसुवागढी–केरुङ प्रसारण लाइन निर्माण