हेटौंडा- कांग्रेस जिल्ला सभापतिहरूको भेलामा चार जिल्ला सभापतिले केन्द्रीय सभापति शेरबहादुर देउवाको प्रतिरक्षा गरेका छन् ।
कञ्चनपुर सभापति हरिप्रसाद बोहराले पार्टीले निर्वाचनमा पराजय हुनुको दोष देउवालाई मात्र दिन नहुने बताए । गुट-उपगुट र कम्युनिस्ट पार्टीहरूबीचको गठबन्धनका कारण चुनावमा हार बेहोर्नुपरेको बताए ।
दोलखा सभापति रुद्र खड्काले निर्वाचनमा हार उम्मेदवारका कमी–कमजोरीका कारण पनि हुन सक्ने औंल्याए । बाजुराका सभापति कविराज पण्डितले विगतमा भएका कमी–कमजोरीबाट पाठ सिकेर अगाडि बढ्नुपर्ने बताए । ओखलढुंगाका सभापति प्रदीप सुनुवारले कांग्रेसजन मिलेर अगाडि जानुपर्ने बताए ।
अन्य जिल्ला सभापतिहरूले भने सभापति देउवाको आलोचना गरे । गोरखाका सभापति हरि घलेले ०३६ सालको जनमत संग्रहमा पराजयको अपजस तत्कालीन पार्टी सभापति बीपी कोइरालाले एक्लै लिएको कुराबाट पाठ सिक्नुपर्ने बताए ।
केही जिल्ला सभापतिले जिल्ला सभापतिमा पराजित नेतालाई पनि राखेर पनि टिकट वितरणको निर्णय गर्ने केन्द्रको परिपत्रलाई समानान्तर कमिटीको अभ्यासका रूपमा पनि औंल्याए । त्यसबाट जितेको सभापतिलाई अवमूल्यन गरिएको उनीहरूको धारणा थियो ।
सिन्धुपाल्चोकका सभापति विकास लामाले दिलमा तीर हानेर दुख्यो कि दुखेन भनेर केन्द्रीय सभापतिले सोध्ने गरेको आरोप लगाए । कालीकोटका हर्ष बमले इरानका राजा रेजी पेहल्वीको उदाहरण दिँदै कांग्रेस सभापति देउवालाई पनि उनीसँगै तुलना गरे ।
बर्दियाका सभापति सञ्जय गौतमले केन्द्रीय सभापतिमा रामचन्द्र पौडेलका पक्षमा भोट हाल्ने पदाधिकारीहरूलाई बारम्बार पीडा दिने काम भएको दाबी गरे ।
खोटाङका नरेशकुमार श्रेष्ठले सभापति देउवाले नातागोतालाई मात्र च्यापेको आरोप लगाए । पाल्पाका सभापति वीरबहादुर रानाले हारेको सभापतिलाई विश्वासमा लिएर टिकट वितरण गर्नु भनेपछि निर्वाचित सभापतिको अधिकार बाँकी नरहेको बताए ।
तेह्रथुमका सभापति गोविन्द ढुंगानाले व्यापारीलाई निर्वाचन अभियानमा लगाएर पार्टीले उल्टै सम्बन्धित क्षेत्रका मानिसलाई पार्टीले टाढा पारेको आरोप लगाए । ललितपुरका सभापति मदनबहादुर अमात्यले निर्वाचन भएको एक वर्षपछि समीक्षा गरेर पार्टी नसुध्रिने बताए । पार्टीमा घात–अन्तर्घातको शृंखला कृष्णप्रसाद भट्टराईलाई हराएरै शुरु भएको औंल्याए ।
धादिङका सभापति रमेश धमलाले निर्वाचन गराउने कांग्रेस र माओवादी गठबन्धनका दुई वटा सरकारका रवैयाकै कारण पार्टीले पराजय बेहोर्नुपरेको बताए ।
केन्द्रीय सदस्य गगन थापाले भने, ‘आज सरकारमा छैन, त्यही भएर पार्टी बनाउन लाग्छु भन्नुभएको छ । तर, न संसद्मा भूमिका निर्वाह गरेको देखिन्छ, न त पार्टी बनाउन कुनै निष्कर्षमा पुग्नुभएको छ ।’ सांसदहरूलाई प्रशिक्षण र निर्देशनको अभाव रहेको उनले औंल्याए ।
दुई सय १५ वटा ठाउँमा चुनाव जितेका कांग्रेसका जनप्रतिनिधिले वर्तमान सरकारले भन्दा बढी र अभूतपूर्व काम गरेर देखाउनुपर्ने थापाले सुझाए । वर्तमान सरकारले लोकतन्त्रमाथि गरिरहेको प्रहारबारे कांग्रेसको कुनै धारणा नआएको उनले बताए ।
प्रकाशित: Dec 31, 2017| 18:23 आइतबार, पुस १६, २०७४