काठमाडौं– राष्ट्रियसभामा नेकपा माओवादी केन्द्रका सांसद नारायणकाजी श्रेष्ठले मुलुकको राष्ट्रिय सार्वभौमिकता र भौगोलिक अखण्डतामाथि प्रहार गर्ने काम भएको बताएका छन्।
राष्ट्रियसभाको बुधबारको बैठकमा उनले हाम्रो भूभागमा विदेशी सुरक्षाकर्मीले बुट बजारिरहेको बताए। 'विदेशीले सीमामा बनाएका तटबन्ध र बाँधले हाम्रा बस्ती डुबानमा छन्। कतिपय असमान सन्धि सम्झौता हाम्रोमा लादिएका छन्। हाम्रा आन्तरिक विषयमा हस्तक्षेप गर्ने काम भएको छ। नेपालका राजनीतिक दलले पनि त्यो अवसर दिएकाले हस्तक्षेप भइरहेको छ,' उनले भने।
केही दिनअघि महाकाली नदीमा तुइन तर्दै गर्दा दार्चुलाका जयसिंह धामी एसएसबीले तुइनको तार काटिदिँदा बेपत्ता भएको प्रसंग उठाउँदै उनले परिवारजनले उनको सास र लाश फेला नपरेको अवस्थामा मृत्यु भएको आशंकामा कुशको शव बनाएर दाहसंस्कार गरेको विषयले हरेक नेपालीको हृदय छियाछिया भएको बताए।
उनले भने, 'अहिलेसम्मको तथ्यले के देखाएको छ भने भारतीय एसएसबीकै कारण उनी बेपत्ता भएको देखिएको छ। यो क्रुर र अमानवीय कार्यका लागि भारतले नेपालसँग अविलम्ब नेपालीसँग सार्वजनिक माफी माग्नुपर्छ। दोषीलाई कडा कारबाही गर्नुपर्छ। नेपाल सरकारले छानबिन समिति बनाएर कूटनीतिक तरिकाले संवादबाट समाधान गरौं। छानबिन समितिको रिपोर्ट छिटो ल्याएर भारत सरकारसँग कुरा गर्नुपर्छ।'