विराटनगर- नेकपा माओवादी केन्द्रले प्रदेश १ संसद्को बैठक अवरुद्ध पारेको छ। प्रदेश १ सरकारका भौतिक पूर्वाधार विकास मन्त्री अम्बिरबाबु गुरुङले रोष्ट्रमबाटै माफी माग्नुपर्ने माग गर्दै माओवादीले संसद् बैठक अवरुद्ध गरेको हो।
सोमबारको बैठक सुरु हुनेबित्तिकै माओवादी केन्द्रका सांसदहरू उठेर विरोध जनाएपछि सभामुख प्रदीपकुमार भण्डारीले बोल्न समय दिएका थिए। त्यसक्रममा दलका उपनेता राईले मन्त्रीले माफी नमागेसम्म बैठक अवरुद्ध हुने भनेपछि सभामुखले बैठक भोलि (मंगलबार)सम्मका लागि स्थगनको घोषणा गरे।
विनियोजन विधेयकमाथि मन्त्रालयबारे सदनमा उठेका प्रश्नको जवाफ दिने क्रममा आइतबार मन्त्री गुरुङले माओवादी सांसद मोहनकुमार खड्काको नाम लिएर अमर्यादित टिप्पणी गरेका थिए।
माओवादी केन्द्रले मन्त्रीको अमर्यादित प्रस्तुति भन्दै माफी माग्नुपर्ने र मन्त्री गुरुङको भनाइ संसदको रेकर्डबाट हटाउनुपर्ने माग गरेको छ। मन्त्रीले रोष्ट्रमबाटै माफी मागेर अभिव्यक्ति रेकर्डबाट नहटाएसम्म सदन अवरोध जारी रहने माओवादी केन्द्र संसदीय दलका उपनेता रामकुमार राईले बताए।
मन्त्री गुरुङले आइतबार बोल्ने क्रममा सभामुखले भनाइ टुंग्याउन चार पटक रुलिङ गर्दा पनि लगातार सांसद खड्कामाथि गालीगलौज गरेका थिए।