सार्वजनिक सवारीसाधन पूर्ण क्षमतामा चलाउन दिइने, निषेध आदेश भने थपियो

काठमाडौं– काठमाडौं उपत्यकामा गत वैशाख १६ गतेदेखि जारी निषेध आदेश थप खुकुलो बनाउँदै भोलि मंगलबारदेखि सार्वजनिक सवारीसाधन सञ्चालन गर्न दिने निर्णय स्थानीय प्रशासनले गरेका छन्। 

काठमाडौं, भक्तपुर र ललितपुरका प्रमुख जिल्ला अधिकारीहरुको बैठकले सार्वजनिक सवारीसाधन पनि सञ्चालन गर्न दिने निर्णय गरेको हो।

‘सार्वजनिक सवारीसाधन कसरी सञ्चालन गर्न दिने भन्ने विषयमा मोडालिटी बनाउन बाँकी छ। बिहान ७ बजेदेखि बेलुका ७ बजेसम्म पूर्ण सिट क्षमतामा जोरबिजोर नम्बरका आधार सञ्चालन गर्न दिनेबारे छलफल भइरहेको छ,’ ललितपुरका प्रमुख जिल्ला अधिकारी ढुण्डीप्रसाद निरौलाले भने।

बैठकले जारी निषेध आदेश एक साता थप्ने पनि निर्णय गरेको छ। हाल जारी निषेध आदेश सोमबार राति १२ बजेबाट सकिँदै छ।