युरोकपः  पोर्चुगल बाहिरियो, बेल्जियम क्वार्टरफाइनलमा

काठमाडौं- युरोकपको सोमबार बिहान भएको खेलमा बेल्जियमले पोर्चुगललाई हराउँदै क्वार्टरफाइनलमा प्रवेश गरेको छ। स्पेनको सेभियामा भएको खेलमा साविक विजेता पोर्चुगललाई बेल्जियमले १-० ले हराएको हो। 

पोर्चुगल भने प्रतियोगिताबाट बाहिरिएको छ। बेल्जियमका विंगर थोर्गन हाजार्डले गरेको गोल नै निर्णायक बन्यो।

हाजार्डले पहिलो हाफको ३ मिनेट बाँकी रहँदा पेनाल्टी क्षेत्र बाहिरबाट गरेको प्रहार सिधै गोल भएको थियो।

अब बेल्जियमले क्वाटर्रफाइनलमा इटालीसँग खेल्ने छ। इंग्ल्याण्डको वेम्बली स्टेडियममा शनिबार राति भएको प्रि-क्वाटरफाइनलमा अष्ट्रियालाई २-१ ले पराजित गर्दै इटाली क्वाटरफाइनलमा पुगेको थियो।