जनकपुर– गएको जेठ २० गतेदेखि बेपत्ता भएकी महोत्तरीको लोहरपट्टी नगरपालिका–७ की सुजिता ठाकुरको शव भेटिएपछि प्रहरीले उनका पति र देवरलाई पक्राउ गरेको छ। आइतबार महोत्तरी प्रहरीले सुजिताको हत्या भएको केही प्रमाण फेला पारेपछि उनीहरूलाई नियन्त्रणमा लिएको हो।
मृतक सुजिताका पति मुकेश ठाकुर र देवर रूपेश ठाकुरलाई लुकेर बसेको अवस्थामा नियन्त्रणमा लिएर अनुसन्धान थालिएको महोत्तरीका प्रहरी उपरीक्षक प्रकाश विष्टले जानकारी दिए।
सुजिता गत जेठ २० गतेदेखि बेपत्ता भएकी थिइन्। प्रहरीले आइतबार आरोपीको घरबाट करिब डेढ किलोमिटर टाढा रहेको उनीहरूको खेतमा सुजिताको शव गाडेको आशंकामा उत्खनन् गरेको थियो।
प्रहरीका अनुसार केश, रगतले लागेर रातो भएको माटो, मलखाद र नुन भेटिएको छ। सोही प्रमाणका आधारमा आवश्यक अनुसन्धानका लागि शंकास्पदलाई पक्राउ गरिएको प्रहरीले जनाएको छ।