टोक्यो ओलम्पिकमा सहभागी हुने नेपाली खेलाडीलाई जापानले गर्‍यो कडाइ

काठमाडौं- डेल्टा भेरिएन्ट धेरै सक्रिय रहेका भन्दै टोक्यो ओलम्पिक आयोजकले नेपालसहित दक्षिण एसियन मुलुकलाई ओलम्पिकमा भाग लिने खेलाडीको कोभिड परीक्षणमा कडाइ गरेको छ।

उसले नयाँ नियम ल्याउँदै डेल्टा भेरियन्टको भाइरस सक्रिय रहेका नेपालसहित पाँच मुलुकलाई सहभागितामा कडाइ गरेको हो।

अब नेपालसहित भारत, पाकिस्तान, माल्दिभ्स, श्रीलंका र अफगानिस्तानका खेलाडीले टोक्यो प्रस्थान गर्नुअघि सात दिनसम्म दैनिक कोभिड–१९ को टेस्ट गर्नुपर्ने भएको छ।

अहिले जापानले हरेक विदेशी खेलाडीलाई जापान जानुअघि चार दिनमा दुईपटक कोभिड–१९ टेस्ट गर्न अनुरोध गरेको छ।
जुलाई २३ मा सुरु हुने प्रतियोगितामा महामारीको प्रभाव कम गर्न यो नियम ल्याइएको आयोजकले बताएको छ।

प्रतियोगिताले कोभिडको नयाँ लहर फैलाउन सक्ने खतरालाई कम गर्न यस्तो नियम ल्याइएको जापानका आलम्पिक मन्त्री तामायो मारुकावाले बताएका छन्।