क्रियाशील सदस्यतामा 'धाँधली' भएको पौडेल पक्षको आरोप

काठमाडौं- नेपाली कांग्रेसको रामचन्द्र पौडेल पक्षले क्रियाशी सदस्यतामा सभापति शेरबहादुर देउवा पक्षले 'धाँधली' गरेको आरोप लगाएको छ। शुक्रबार पौडेल समूहको भेलामा सहभागी अधिकांश नेताहरूले क्रियाशील सदस्यताका विषयमा धाँधली भएको भन्दै असन्तुष्टि व्यक्त गरेको बैठकमा सहभागी एक नेताले जानकारी दिए। 

बैठकले क्रियाशील सदस्यताको विषय निष्पक्ष रूपमा टुंग्याउन मागसमेत गरेको छ। विधि र विधान अनुसार क्रियाशील सदस्यताको टुंगो लागोस् भन्ने आफूहरुको अपेक्षा रहेको अर्जुननरसिंह केसीले बताए।

अन्य पार्टीबाट आएकाहरुलाई कांग्रेसले बनाएको मापदण्डविपरीत क्रियाशील सदस्यता दिइएको भन्दै केसीको असन्तुष्टि छ। ‘त्यस विषयमा हामीले गम्भीरतापूर्वक छलफल गर्‍यौं। यसलाई निष्पक्षतापूर्वक टुंग्याऔं भन्ने निश्कर्ष निकालेका छौं’, केसीले भने।

उनले पार्टीको वैधानिकता जोगाउनका लागि भएपनि भदौमा महाधिवेशन गर्नैपर्ने धारणा नेताहरूले छलफलमा राखेको उल्लेख गरे। 

बैठकमा महामन्त्री शशांक कोइराला, कोषाध्यक्ष सीतादेवी यादव नेताहरु प्रकाशमान सिंह, शेखर कोइराला, रामशरण महत, सुजाता कोइराला, मिनेन्द्र रिजाल, अर्जुननरसिंह केसी, दिलेन्द्र बडूसहितका नेताहरू सहभागी भएका थिए।