काठमाडौं- पोखरा महानगरपालिकाले सुदूरपश्चिम प्रदेश सरकारको भन्दा दोब्बर आन्तरिक राजस्व संकलन गर्ने लक्ष्य लिएको छ।
आगामी आर्थिक वर्ष २०७८/०७९मा ६ अर्ब २७ करोड रुपैयाँ बराबरको बजेट सार्वजनिक गर्दै पोखरा महानगरपालिकाले बजेटको स्रोतको रुपमा २ अर्ब २२ करोड रुपैयाँ आन्तरिक राजस्व संकलनबाट जुटाइने उल्लेख गरेको हो।
जबकि सुदूरपश्चिम सरकारले आगामी आर्थिक वर्षका लागि ३० अर्ब ३३ करोड रुपैयाँ बराबरको बजेट सार्वजनिक गर्दै स्रोतको रुपमा १ अर्ब ८ करोड ३ लाख २२ हजार रुपैयाँ आन्तरिक राजस्व संकलन गर्ने लक्ष्य लिएको छ।
सुदूरपश्चिम सरकारले गत १ असारमा सार्वजनिक गरेको बजेटमा बजेटको स्रोतको रुपमा आन्तरिक राजस्वबाट १ अर्ब ८ करोड ३ लाख २२ हजार रुपैयाँ जुटाइने उल्लेख गरिएको छ।
त्यस्तै भरतपुर महानगरपालिकाको आन्तरिक राजस्व संकलनको लक्ष्य पनि सुदूरपश्चिम प्रदेश सरकारको भन्दा बढी रहेको रहेको छ।
आगामी आर्थिक वर्षमा ४ अर्ब ८१ करोड १२ लाख रुपैयाँ बराबरको बजेट ल्याएको भरतपुर महानगरपालिकाले आन्तरिक राजस्वमार्फत् १ अर्ब २० करोड रुपैयाँ स्रोत जुटाउने उल्लेख गरेको छ।