काठमाडौं– ललितपुर महानगरपालिकाको नगरसभा बहुमत सदस्यहरुले बहिष्कार गर्ने भएका छन्। नगरसभामा ९२ सदस्य छन्। तीमध्ये ६६ जनाले बहिकार गर्ने निर्णय गरेको वडा नम्बर ३ का वडाध्यक्ष श्रीगोपाल महर्जनले विज्ञप्तिमार्फत जानकारी दिएका हुन्। महानगरमा एमाले र माओवादी केन्द्रबाट निर्वाचित नगरसभा सदस्यहरुले बहिष्कार गर्न लागेका हुन्।
विज्ञप्तिमा ६६ जना नगरसभा सदस्य र ३९ जना कार्यपालिका सदस्यमध्ये २६ जना नगरसभामा सहभागी नहुने उल्लेख छ। नीति तथा कार्यक्रम पारित हुनुअघि कुनै छलफल नगरिएको भन्दै बहुमत कार्यपालिका सदस्यले असन्तुष्टि जनाएका छन्। बिहीबार देशभरका स्थानीय तहमा आगामी आर्थिक वर्षको बजेट सार्वजनिक हुँदै छ। बजेट सार्वजनिक गर्न ललितपुर महानगरले दिउँसो १ बजेका लागि नगरसभा बैठक बोलाएको छ।
ललितपुरमा मेयर चिरीबाबु महर्जन र उपमेयर गिता सत्याल नेपाली कांग्रेसका हुन्। मेयर र उपमेयर कांग्रेसको भए पनि लतिलपुर महानगरमा कांग्रेस अल्पमतमा छ।