ललितपुरमा ७५ वर्ष माथिकालाई भोलि खोप लगाइँदै

काठमाडौं– ललितपुर महानगरपालिकाले ७५ वर्षमाथिका नागरिकलाई कोरोनाविरुद्ध  कोभिसिल्ड खोप लगाउने भएको छ। महानगरले सूचना जारी गर्दै बुधबारदेखि दोस्रो मात्रामा खोप लगाइने जनाएको छ। खोप बुधबार बिहान १० बजेदेखि अपराह्न ४ बजेसम्म खोप लगाइनेछ।  

महानगरले ७७ वर्ष माथिका दुई हजार दुई सय २० जना कोभिसिल्डको दोस्रो मात्राको खोप दिन लागेको हो। वडा कार्यालयबाट सिफारिस गरिएका व्यक्तिहरूले मात्रै खोप लगाउन पाउनेछन्। महानगरपालिकाले खोप लगाउन आठ वटा खोप केन्द्र तोकेको छ।

महानगरपालिकाले लगनखेलको पशु अस्पताल, पाटनढोका पाटन हाइस्कुल, ललितपुर महानगरपालिका प्रांगण, धापाखेल स्वास्थ्य चौकीमा खोप केन्द्र निर्धारण गरेको छ। यस्तै सुनाकोठीको बालकुमारी स्कुल, कार्य विनायक स्कुल, हरिसिद्धि स्वास्थ्य चौकी र सैंबु स्वास्थ्य चौकीमा खोप लगाउने व्यवस्था गरिएको महानगरपालिकाले जनाएको छ।