लुम्बिनीका ४ जसपा सांसदको मुद्दाको पूर्ण सुनुवाइ असार २१ गते

काठमाडौं- लुम्बिनी प्रदेशका जनता समाजवादी पार्टी (जसपा) नेपालका चार जना सांसदहरुको मुद्दाको पूर्ण सुनुवाइ असार २१ गते हुने भएको छ।

न्यायाधीशद्वय दीपककुमार कार्की र हरिप्रसाद फुँयालको संयुक्त इजलासले असार २१ गते पूर्ण सुनुवाइका लागि पेशी तोक्न आदेश गरेको हो।

प्रदेश निर्वाचन आयोग लुम्बिनीको लिखित जवाफ म्यादभित्र पेश नभएको र अन्यको लिखित जवाफ पेश भइसकेको भन्दै इजलासले पूर्ण सुनुवाइको मिति तोकेको हो।

पूर्ण सुनुवाइबाटै चारै जना सांसदहरुको पद रहने कि नरहने भन्ने तय हुनेछ। जसपाको उपेन्द्र यादव पक्षले कारबाही गरेपछि चारै जनाले सर्वोच्चमा रिट दायर गरेका थिए। अदालतले अन्तरिम आदेश दिएपछि उनीहरुको पुनर्वहाली भएको थियो।
चारै जना अहिले लुम्बिनी प्रदेश सरकारमा मन्त्री रहेका छन्।