भारतमा कोरोना संक्रमण ८८ दिनयताकै कम, २८ करोड डोज भ्याक्सिन लगाइयो

नयाँदिल्ली- विगत २४ घण्टामा भारतमा ५३ हजार २५६ जनामा कोरोना संक्रमण भएको छ। यो पछिल्ला ८८ दिनयताकै कम भएको केन्द्रीय स्वास्थ्य मन्त्रालयले जानकारी दिएको छ। 

पछिल्लो पटक थपिएका संक्रमितसँगै भारतमा हालसम्म २ करोड ९९ लाख ३५ हजार २२१ जनामा कोरोना संक्रमण भएको छ। यीमध्ये २ करोड ८८ लाख ४४ हजार १९९ जना संक्रमणमुक्त भएका छन् भने ३ लाख ८८ हजार १३५ जना संक्रमितको मृत्यु भएको छ। हाल भारतमा ७ लाख २ हजार ८८७ जना सक्रिय संक्रमित छन्।

गत मे ६ मा भारतमा एकैदिन ४ लाख १४ हजार ४३३ जना संक्रमित भेटिएको थियो। यो हालसम्मकै सबैभन्दा संक्रमित भेटिएको दिन हो। 

हालसम्म भारतमा २८ करोड ३६ हजार ८९८ डोज भ्याक्सिन लगाइसकिएको समेत मन्त्रालयले जानकारी दिएको छ।