काठमाडौं- नेपाल कम्युनिस्ट पार्टी (एमाले)का दुई पक्षबीच शुक्रबार पनि छलफल भएको छ। पार्टीको एकता बचाउने प्रयासमा लागेका दुवै पक्षका नेताहरू सहभागी भएको बैठक बिहीबार र शुक्रबार चलेको हो।
प्रधानमन्त्री केपी शर्मा ओलीका 'अतिनिकट' मानिने पूर्वसभामुख सुवास नेम्बाङले नै ओली पक्षको नेतृत्व गरी छलफल गरेका छन्। नेम्वाङले पार्टी एकताका लागि आफूहरू अधिकतम लचक बन्न तयार गरेको दाबी गरेका छन्।
'बिहीबार पनि दुवै पक्षका कमरेडहरूबीच छलफल भयो। हामी निरन्तर छलफलमा नै छौँ। मुख्यतया पार्टी एकतालाई निष्कर्षमा पुर्याउने संकल्पका साथ छलफलमा लागेका छौँ,' नेम्वाङले भने।
बिहीबार र शुक्रबारका दुवै छलफलमा सहभागी नेपाल पक्षका एक नेताले भने छलफल निरन्तर भइरहे पनि कुनै उल्लेख्य प्रगति नभएको बताएका छन्। 'खासै प्रगति भएको छैन। छलफल भएको छ। ठोस प्रगति छैन,' नेता नेपाल निकट ती नेताले भने। पार्टी एकताका लागि आफूहरूले यसअघि नै राखेका प्रस्तावहरू राखेको तर ओली पक्षले सकारात्मक धारणा राखेको नपाएको ती नेताको भनाइ छ।
शुक्रबार राजधानीको एक होटलमा दुवै पक्षका नेताहरू छलफलका लागि बसेका थिए। छलफलमा ओली पक्षबाट सुवास नेम्वाङ र अर्थमन्त्री विष्णु पौडेल सहभागी थिए भने नेता नेपालका तर्फबाट सुरेन्द्र पाण्डे, घनश्याम भुसाल, गोकर्ण विष्ट सहभागी भएको बताइएको छ।
पछिल्लो समय माधवकुमार नेपाललाई छुट्टै दल बनाएर अघि बढ्नुपर्ने र एमाले एकता कायम हुनुपर्ने छुट्टाछुट्टै प्रकृतिका सुझाव उनकै पक्षबाट आइरहेका छन्। यसकारण उनी दबाबामा छन् भने ओलीले पनि आफू लचक हुने बताउँदै आएका छन्।