पर्सा- पर्साका विभिन्न मठमन्दिरका पूजारीहरुलाई विश्व हिन्दु परिषद् नेपालले राहत वितरण गरेको छ।
निषेध आदेशका कारण मठ-मन्दिर बन्द हुँदा पूजारीहरुलाई दैनिकी चलाउन अप्ठेरो भएको भन्दै राहत वितरण गरिएको हो। सरकारले राहत उपलब्ध नगराएपछि अहिले उनीहरुले विभिन्न सहयोगी दाताले उपलब्ध गराएको राहतले जिविकोपार्जन गर्दै आएका छन्।
शुक्रबार विश्व हिन्दु परिषद्ले उपलब्ध गराएको राहतले पूजारीहरुमा थप मद्दत पुगेको छ। विभिन्न ठाउँका पुजारीहरुलाई चामल, दाल, नुन, खानेतेल, आलु, प्याजलगायतको आवश्यक खाद्यन्न समाग्री उपलब्ध गराइएको परिषद्का महासचिव जितेन्द्र कुमार सिंहले बताए। परिषद्ले राहतको आवश्यकता रहेका देशभरिकै ससाना मठमन्दिरमा आवश्यक खाद्य सामग्री तथा स्वास्थ्य सामग्री उपलब्ध गराउँदै आएको उनले बताए।
विश्व हिन्दु परिषद्ले असहायलाई भोजन व्यवस्था, मेडिकल शिविर, जाडोयाममा न्यानो कपडा वितरण, निःशुल्क योग प्रशिक्षण, आयुर्वेद औषधालय सञ्चालन, युवा लक्षिक स्वरोजकारमूलक प्रशिक्षण सञ्चालनलगायतको काम गर्दै आएको उनको भनाइ छ।