धनगढी- जिल्ला प्रशासन कार्यालय कञ्चनपुरले महाकाली नदी तटीय क्षेत्रका बासिन्दालाई सतर्क रहन आग्रह गरेको छ। जिल्ला प्रशासनले शुक्रबार अति जरुरी सूचना जारी गर्दै महाकाली नदीको तटीय क्षेत्रमा बेलुकासम्म पानीको बहाब उच्च रहने सम्भावना रहेको बताउँदै सतर्क रहन आग्रह गरेको हो।
'महाकाली बेसिन फिल्ड कार्यालय अत्तरियाको असार २ गते बिहानको अपडेट अनुसार महाकाली नदी दार्चुलास्थित दत्तुको बाढी मापन केन्द्रमा जलसतह ५.८० मिटर र परिगाउँ डडेल्धुरामा जलसतह ३.५० मिटर पुगेको र बढ्दो क्रममा रहेको छ,' प्रशासन कार्यालयको सूचनामा भनिएको छ, ‘महाकाली नदीको कञ्चनपुर तटीय क्षेत्रमा बाढी आउन सक्ने जोखिम रहेकाले बाढीको जोखिम रहेकोले सो क्षेत्रमा नजान, जोखिम आंकलन गरि सुरक्षित स्थानमा स्थानान्तरण हुन एवं उच्च सतर्कता अप्नाउन सबैलाई जानकारी गराइन्छ।’
सूचनामा कुनै विपद् वा घटना भएमा तत्काल जिल्ला आपत्कालीन कार्य सञ्चालन केन्द्रलाई सम्पर्क गर्न अनुरोध गरेको छ।