काठमाडौं– देशभर मनसुनी वायुको प्रभाव बढिरहेको छ। जल तथा मौसम विज्ञान विभागका अनुसार देशभर सामान्यदेखि पूर्ण बदली रही प्रदेश १, गण्डकी प्रदेश, लुम्बिनी प्रदेश र सुदूरपश्चिम प्रदेशका केही स्थानमा वर्षा भइरहेको छ।
बिहीबार - मौसम पूर्वानुमान महाशाखाको मौसम पूर्वानुमान बुलेटिनअनुसार बिहीबार दिउँसो देशभर सामान्यदेखि पूर्ण बदली रहनेछ। देशका अधिकांश स्थानमा हल्कादेखि मध्यम वर्षाको सम्भावना छ। सुदूरपश्चिम प्रदेश, लुम्बिनी प्रदेशका र प्रदेश १ का एक–दुई स्थानमा मेघ गर्जनसहित वर्षाको सम्भावना रहेका महाशाखाले जनाएको छ।
राति देशका अधिकांश स्थानमा हल्कादेखि मध्यम वर्षाको सम्भावना छ। सुदूरपश्चिम प्रदेश, वागमती प्रदेश र प्रदेश १ का एक–दुई स्थानमा भारी वर्षाको सम्भावना छ।
शुक्रबार - दिउँसो देशभर सामान्यदेखि पूर्ण बदली रहनेछ। देशका अधिकांश स्थानमा हल्कादेखि मध्यम वर्षाको सम्भावना छ। सुदूरपश्चिम प्रदेश, बागमती प्रदेश र लुम्बिनीका एकदुई स्थानमा भारी वर्षाको सम्भावना रहेको महाशाखाले जनाएको छ।
शनिबार - देशका धेरै स्थानमा हल्कादेखि मध्यम वर्षाको सम्भावना छ। प्रदेश १, गण्डकी प्रदेश, लुम्बिनी प्रदेश र सुदूरपश्चिम प्रदेशका एक वा दुई स्थानमा भारी वर्षाको सम्भावना छ।
कुन नदी र जिल्ला प्रभावित
महाशाखाको बुलेटिनअनुसार बिहीबार बिहानको मापनअनुसार बदिगाड रुद्राबेनी र सुनकोसी दोलालघाट जलमापन केन्द्रमा जलसतह सतर्कता तह आसपास छ। कन्काई, कोसी, बागमती, कर्णाली, महाकाली र यसका सहायक नदीमा बहाव बढ्दो क्रममा छ तथा सबैमा बहाव सतर्कता तहभन्दा तलै छ।
कोसी, नारायणी, कर्णाली र महाकाली जलाधारका केही स–साना सहायक नदीमा बहाव बढ्ने र केही स–साना नदीमा आकस्मिक बहाव भई सतर्कता तह आसपास पुग्न सक्ने पूर्वानुमान छ। यस्तै कन्काई, कमला, बागमती र यसका सहायक नदीमा बहाव सामान्य घटबढ हुने तथा सतर्कताभन्दा तलै हुने बाढी पूर्वानुमान महाशाखाले जनाएको छ।