विराटनगर- अख्तियार दुरुपयोग अनुसन्धान आयोगले सुनसरीको धरानस्थित बीपी कोइराला स्वास्थ्य विज्ञान प्रतिष्ठानमा छापा मारेको छ।
बीपीको बेथिति अन्त्यको लागि गठन भएको धरान नागरिक दबाब सञ्जालले प्रतिष्ठानलाई एक साताको अल्टिमेटम दिएसँगै प्रतिष्ठानमा अख्तियार दुरुपयोग अनुसन्धान आयोगले छापा मारेको हो।
अनुसन्धानमा खटिएका एक अधिकारीले प्रतिष्ठानमा भइरहेको अनियमितताको विभिन्न विषयमा उजुरी परेकाले अनुसन्धान र अनुगमन गरेको जानकारी दिए। प्रतिष्ठानसँग सम्बन्धित धेरै विषयमा छानबिन भइरहेकोले अनुसन्धानको क्रममा प्रतिष्ठान गएको उनले बताए।
पछिल्लो समय प्रतिष्ठानमा भएका अनियमितताका सन्दर्भमा नागरिक दबाब सञ्जालले जेठ २४ गते प्रतिष्ठानका चारै जना पदाधिकारीहरूलाई भेटेर प्रतिष्ठान सुधारको लागि एक साताको अल्टिमेटम दिँदै ध्यानाकर्षण पत्र बुझाएको थियो। अल्टिमेटमको समय सोमबार सकिँदै छ।
आयोगको प्रादेशिक कार्यालय इटहरीका निमित्त प्रमुख पुरुषोत्तम ढकाल नेतृत्वको टोलीले प्रतिष्ठानका विभिन्न विभागका पदाधिकारीहरूसँग सोधपुछसमेत गरेको बताइएको छ।
आयोगको टोलीले शिक्षाध्यक्ष डा. गुरु खनालसँग भेट गरी लेखा शाखा, खरिद शाखा तथा मूल्याङ्कन शाखाबाट केही महत्वपूर्ण विषयमा विभागका कर्मचारीहरूलाई सोधपुछ गरेको थियो।