धनगढी- सुदूरपश्चिम प्रदेश सरकारले आर्थिक वर्ष २०७८/०७९ का लागि ३० अर्ब बराबरको बजेट ल्याउने तयारी गरेको छ। प्रदेशको आर्थिक मामिला तथा योजना मन्त्रालयका अनुसार बजेट ३० अर्ब रूपैयाँ आसपास रहने छ।
सुदूरपश्चिम प्रदेश सरकारले आर्थिक वर्ष २०७७/०७८ का लागि कुल ३३ अर्ब ३८ करोड १३ लाख ४८ हजार बराबरको बजेट प्रस्तुत गरेको थियो। मंगलबार अपरान्ह ४ बजे बस्ने प्रदेश सभाको बैठकमा आर्थिक मामिला तथा योजना मन्त्री प्रकाशबहादुर शाहले बजेट प्रस्तुत गर्ने छन्।
कोरोना महामारी रोकथाम तथा नियन्त्रणलाई उच्च प्राथमिकता दिइएको बजेटमा स्वास्थ्य, शिक्षा, कृषि, रोजगारीलाई प्राथमिकतामा राखिएको छ।
आर्थिक मामिला तथा योजना मन्त्रालयका सचिव झलक अधिकारीले आगामी आर्थिक वर्षका लागि २३ अर्ब ८९ करोड रूपैयाँको स्रोत सुनिश्चित भएको बताए।
संघीय सरकारले प्रदेश सरकारलाई १४ अर्ब ५८ करोड दुई लाख रकम विनियोजन गरेको अधिकारीको भनाइ छ। चालु आर्थिक वर्षमा १४ अर्ब २५ करोड ८२ लाख रकम अनुदान उपलब्ध गराएको थियो।
अधिकारीका अनुसार चालु आर्थिक वर्ष २०७७÷७८ को बचत, समपुरक अनुदान, विशेष अनुदान, राष्ट्रिय प्राकृतिक स्रोत तथा वित्त आयोगबाट रोयल्टी बाँडफाटबाट प्राप्त हुने सात अर्ब ४३ करोड रूपैयाँ बजेटमा समावेश हुनेछ। प्रदेशको आन्तरिक राजश्व परिचालन करिब ८० करोड रूपैयाँ प्राप्त हुने प्रक्षेपण गरिएको उनले बताए।