काठमाडौं– युरो कपको समूह चरणअन्तर्गतको खेलमा नेदरल्यान्ड्सले पहिलो जित निकालेको छ। समूह सी को आइतबार राति सम्पन्न खेलमा नेदरल्यान्ड्सले युक्रेनलाई ३–२ गोलले पराजित गरेको हो।
नेदरल्यान्ड्सको जितका लागि जोर्जिनियो वाइनाल्डम, वोउट वेगह्रोस्ट र डेन्जल डमफ्रिजले गोल गरेका थिए।
यता खेलको अन्तिम समयमा युक्रेनका एन्ड्रि यरमलेन्को र रोमन यारेमुकले गोल फर्काए।
खेलको पहिलो हाफ गोलरहित बराबरीमा रोकिए पनि नेदरल्यान्ड्को आमस्टारडममा सम्पन्न खेलको दोस्रो हाफमा पाँच गोल पूरा भएका थिए।
खेलको ५२ औं मिनेटमा वाइनाल्डम र ५८ औं मिनेटमा वेगह्रोस्टले गोल गरेपछि डच टिमले दुई गोलको अग्रता बनायो तर खेलको ७५ औं र ७९ औं मिनेटमा युक्रेनका योर्मोलेन्को र यारेमुले लगातार दुई गोल फर्काउँदै खेललाई पुनः बराबरीमा ल्याएका थिए।
तर, अन्तिम पाँच मिनेट बाँकी रहँदा डमफ्रिजले गोल गर्दै घरेलु टिमलाई जित दिलाएका थिए। यो जितसँगै तीन अंक बनाएको नेदरल्यान्ड्स समूह सी को दोस्रो स्थानमा छ।
नेदरल्यान्ड्सले युक्रेनको पोस्टमा पाँच प्रहार गरे पनि तीनबाहेक सबै प्रहार खेर गए। युक्रेनको सात प्रहारमा दुई प्रहार सार्थक भएका थिए।
यता आइतबार रातिको अर्को खेलमा ३–० गोलको जित निकालेको अष्ट्रिय समूह सी को शीर्षस्थानमा छ। त्यस्तै, युक्रेन तेस्रो स्थानमा छ भने नर्थ म्यासेडोनिया चौथो तथा अन्तिम स्थानमा छ।