कर्णाली प्रदेशका मुख्यमन्त्री शाहीलाई एमालेको १९ बुँदे मागपत्र

काठमाडौं– कर्णाली प्रदेशका मुख्यमन्त्री महेन्द्रबहादुर शाहीलाई प्रमुख प्रतिपक्षी दल नेकपा (एमाले) ले बजेटका विषयमा मागपत्र बुझाएको छ। 

एमाले संसदीय दलका नेता यमलाल कँडेलको टोलीले १९ बुँदे मागपत्र पेस गरेको मुख्यमन्त्रीको शाहीको सचिवालयले जनाएको छ। मुख्यमन्त्री शाही र कँडेलबीच आर्थिक वर्षको नीति तथा कार्यक्रम र बजेटका सम्बन्धमा छलफलसमेत भएको छ। 

छलफलका क्रममा प्रमुख प्रतिपक्षी दल नेता कँडेलले कर्णाली प्रदेश सरकारको आगामी आर्थिक वर्षको बजेटमा समावेश गर्न भन्दै मागपत्र बुझाएका हुन्। सरकारलाई दिएको समर्थन एमालेले फिर्ता लिएपछि मुख्यमन्त्री शाहीले विश्वासको मत लिएका थिए।

तर, एमालेकै चार जना सांसदहरुले विश्वासको मत दिएर शाहीको सरकार जोगाइदिएका हुन्। पछि एमालेले चार जनालाई कारबाही गरेको थियो। सर्वोच्च अदालतले पुनः उनीहरुलाई पुनर्वहालीको आदेश गरिसकेको छ।