सभामुखले बोलाएको दल प्रमुख र पूर्वप्रधानमन्त्रीहरूको बैठक सुरु

काठमाडौं- सभामुख अग्निप्रसाद सापकोटाले बोलाएको दलका प्रमुख र पूर्वप्रधानमन्त्रीहरूको बैठक सुरु भएको छ। नयाँ बानेश्वरस्थित संसद् भवनमा शुक्रबार दिउँसो २ बजेका लागि बोलाइएको बैठक केही समयअघि सुरु भएको हो। 

समसामयिक राजनीतिक विषयमा छलफल गर्न सभामुख सापकोटाले संसदमा प्रतिनिधित्व गर्ने सबै दलका प्रमुखहरूलाई बैठकमा बोलाएका छन्। 

बैठकमा प्रधानमन्त्री केपी शर्मा ओलीलाई पनि नेकपा एमाले अध्यक्षहरूलाई पनि बोलाइएको छ। तर अझसम्म पनि ओली बैठकमा उपस्थित भएका छैनन्। 

बैठकमा नेपाली कांग्रेसका सभापति शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल प्रचण्ड, पूर्वप्रधानमन्त्रीद्वय माधवकुमार नेपाल, डा. बाबुराम भट्टराई, जनता समाजवादी पार्टीका अध्यक्ष उपेन्द्र यादव, नेपाल मजदुर किसान पार्टीका प्रेम सुवाललगायत सहभागी छन्।

प्रधानमन्त्री ओलीले प्रतिनिधि सभा दोस्रोपटक विघटन गरेपछि सभामुख सापकोटाले यही जेठ २३ गते कानुनविद् र जेठ ११ गते पूर्वसभामुखसँग छलफल गरेका थिए।