काठमाडौं- फ्रान्सका फरवार्ड ओलिभिए जिरुले दुई गोल गरेपछि फ्रान्सले बुल्गेरियाविरुद्ध सहज जित निकालेको छ।
फ्रन्समा मंगलबार राति सम्पन्न खेलमा घरेलु टिमले बुल्गेरिया माथि ३–० गोलको जित निकालेको हो।
बल पोसेसनमा पनि बलियो देखिएको फ्रान्सले खेल अवधिभर ११ पटक बुल्गेरियाको पोस्टमा प्रहार गरेको थियो। त्यसबाहेक १४ प्रहार भने पोस्टबाहिर गएको थियो।
त्यसमध्ये खेलको २८औं मिनेटमा फरवार्ड एन्टोनी ग्रिजम्यानको प्रहारले भने जालि चुम्न सक्यो। ग्रिजम्यानको गोलसँगै पहिलो हाफमा फ्रान्स एक गोलले अघि रह्यो।
खेलको ४०औं मिनेटमा करिम बेञ्जिमालाई प्रतिस्थापन गर्दै मैदान छिरेका जिरुले दोस्रो हाफको ८२औं र ८९औं मिनेटमा गोल गरेका थिए।
यता, मैदानमा ८३ मिनेट बिताएका अर्को फरवार्ड केलियन एम्बाप्पेले भने व्यक्तिगततर्फ गोल गर्न सकेनन्।
बरु उनलाई प्रतिस्थापन गर्दै मैदान छिरेका बेन यडरले तेस्रो गोलको लागि पास उपलब्ध गराएका थिए।