जनकपुरधाम- प्रदेश २ सरकारमा कांग्रेस र माओवादी सहभागी हुने भएपछि मन्त्रालयको संख्या १० वटा बनाइएको छ। दुई दललाई सरकारमा सहभागी गराउन सोमबार बसेको मन्त्रिपरिषद् बैठकले ६ वटा मन्त्रालयलाई फुटाएर १० वटा बनाउने निर्णय गरिएको आन्तरिक मामिला तथा कानुनमन्त्री ज्ञानेन्द्रकुमार यादवले जानकारी दिए।
कांग्रेस र माओवादी केन्द्र सरकारमा सहभागी हुन तयार भएपछि मुख्यमन्त्री लालबाबु राउतले मन्त्रालय टुक्र्याउन लागेका हुन्। मन्त्री यादवका अनुसार भौतिक मन्त्रालय, सामाजिक विकास मन्त्रालय, उद्योग तथा पर्यटन र आन्तरिक मामिला तथा कानुन मन्त्रालयलाई टुक्र्याएर २–२ वटा बनाइएको छ।
यीमध्ये भौतिकबाट टुक्र्याइएका दुवै मन्त्रालय र अर्को एक रोजाइअनुसारको मन्त्रालय नेपाली कांग्रेसलाई दिने तयारी गरिएको छ भने अर्को एउटा मन्त्रालय माओवादी केन्द्रलाई दिइनेछ। बाँकी दुई मन्त्रालय राउत आफैं मातहतमा राख्नेछन्।
मुख्यमन्त्री राउत निकट स्रोतका अनुसार कांग्रेस र माओवादीलाई सरकारमा सहभागी गरेर बुधबार नै मन्त्रीहरूको शपथ ग्रहण गराउने तयारी छ।