काठमाडौं- रौतहटमा निषेध आदेश कार्यान्वयन गराउन खटिएका सुरक्षाकर्मी र स्थानीयवासीबीच झडप भएको छ। सोमबार राति भएको झडपमा परेर डीएसपीसहित सात प्रहरी घाइते भएका छन्।
गरुडा नगरपालिका–२ मा विवाहका क्रममा डिजे बजाएर भीडभाड गरेपछि प्रहरी टोली सम्झाउन गएको थियो। तर, प्रहरी टोली देख्ने बित्तिकै स्थानीयले ढुंगामुढा गरेपछि झडप भएको प्रहरीले जनाएको छ।
सुरुमा इलाका प्रहरी गरुडाले दुई सुरक्षाकर्मी पठाएर डिजे बन्द गर्न र भीडभाड नगर्न सम्झाएको थियो। तर, स्थानीयवासीले उनीहरूलाई घेराबन्दी गरेपछि डीएसपी द्वारिका घिमिरेसहितको टोली पुगेको थियो।
उक्त टोलीमाथि पनि स्थानीयले ढुंगामुढा गरेपछि झडप भएको डीएसपी घिमिरेको भनाइ छ। उनका अनुसार प्रहरीले झडपमा संलग्न तीनजनालाई नियन्त्रणमा लिएको छ।
झडपमा डीएसपी घिमिरेको टाउकोमा सामान्य चोट लागेको छ भने अन्य ६ प्रहरी सामान्य घाइते भएका छन्।