राउटे युवतीमाथि यौन दुर्व्यवहार गर्नेलाई हदैसम्मको कारबाही गर्न माग

सुर्खेत- राउटे युवतिमाथि यौन दुर्व्यवहार गर्नेलाई हदैसम्मको कारबाहीको माग गरिएको छ।

दैलेखको गुराँस गाउँपालिका र जनजाति महासंघ सुर्खेतले दोषीलाई हदैसम्मको कारबाहीको माग गरेका छन्। गाउँपालिकाका अध्यक्ष खेमराज वली र जनजाति महासंघ सुर्खेतका अध्यक्ष जीवनकुमार शाक्यले विज्ञप्ति जारी गर्दै दोषीलाई हदैसम्मको कारबाहीको माग गरेका हुन्।

‘फिरन्ते जीवन बिताइरहेको राउटे समुदायका युवतीसँग एक होटलको बन्द कोठामा अश्लील क्रियाकलाप गरेको भिडियो सामाजिक सञ्जालमा सार्वजनिक भइरहेकोप्रति गाउँपालिकाको गम्भीर ध्यानाकर्षण भएको छ,’ वलीद्वारा हस्ताक्षरित विज्ञप्तिमा भनिएको छ, ‘घटनामा संलग्नलाई हदैसम्मको कारबाही गर्न माग गर्दछौं।’

फिरन्ते जीवन विताउने भए पनि राउटे समुदायले गुराँस गाउँपालिका–८ का स्थायी वासिन्दाको रुपमा परिचयपत्र लिएका छन्। राउटेहरुको संरक्षण र भत्ता वितरणलाई व्यवस्थित बनाउन गाउँपालिकाले केही वर्षअघि मात्रै राउटे समुदायलाई परिचयपत्र दिएको थियो।