हुम्लामा भेटिए लक्षणबिनाका काेराेना संक्रमित

हुम्ला- हुम्लाका अधिकांश गाउँपालिकामा कोरोनाको लक्षणबिनाका सङ्क्रमितहरू देखिन थालेका छन्। दोस्रो लहरपछि यहाँ लक्षणबिनाका बिरामी देखिन थालेका हुन्।

एन्टिजेन विधिबाट परीक्षण गर्दा कोरोना पुष्टि भए पनि १० दिन आइसोलेसनमा बस्दा संक्रमितहरूमा कुनै लक्षण देखिएकाे छैन। 

संक्रमित पुष्टि भएका जिल्लाका अधिकांश व्यक्तिहरू लक्षण नभएको देखिएको जिल्ला अस्पतालका चिकित्सक टासी आङ्जु लामाले बताए।

कोरोना भएर आइसेलेसनमा बस्दै आएका संक्रमित ९ देखि १० दिनमा घर फर्किने गरेको र आइसोलेसन अवधिमा उनीहरूमा कुनै पनि कोरोनाको लक्षण नदेखिएको चिकित्सक लामाले बताए। 

जिल्लाका सातवटै गाउँपालिकामा एन्टिजेन किटबाट एक हजार २०० जनाको परीक्षण गर्दा १७५ जनामा कोरोना संक्रमण पुष्टि भएको थियो। त्यसमा १२४ जनामा लक्षण नदेखिएको उनकाे भनाइ छ। 

कोरोना पुष्टि भएका मध्ये ६ जनालाई अक्सिजनको आवश्यकता परेको र १५ जनालाई सामान्य रुघाखोकी, ज्वरो आउने समस्या देखिएको उनले बताए। रासस