विश्वकपभरि सरोज खनाल ‘क्याप्टेन’का कप्तान

काठमाडौं- नायक सरोज खनाल यतिबेला फुटबल खेलिरहेका छन् । विश्वकपको मुखैमा सुटिङ भइरहेको फिल्म ‘क्याप्टेन’मा पनि फुटबलकै कथा छ । कप्तानको भूमिकामा छन्, नायक खनाल । र, बलसँगै रमाइरहेका छन् । 

बिहानदेखि साँझसम्म उनी खेलाडीको ‘ड्रेस’ लगाउँछन् । भन्छन्, ‘मलाई त आफैंले विश्वकप खेलिरहेको छुजस्तो लागिरहेको छ ।’

१७ वर्ष अमेरिका बसेका उनी अहिले नेपाली फिल्म उद्योगमा निरन्तरता दिइरहेका छन् । फुटबल उनलाई मन पर्ने खेल हो । ब्राजिल र अर्जेन्टिनाका खेलाडीलाई उनको सपोर्ट छ । र, उनलाई ‘इन्डिभिजुअल’ अर्जेन्टिनाका खेलाडी मेस्सी मन पर्छन् । 

स्कुले जीवनमा पनि उनले फुटबल खेले । अहिले ‘क्याप्टेन’ले फेरि उनको बचपन फर्काइदिएको छ । संयोगले विश्वकपको समयमा ‘क्याप्टेन’ सुटिङ भइरहेको छ । दिनभरि सुटिङमा व्यस्त रहने खनाल दिनचर्या सुनाउँछन्, ‘दिनभरि सुटमा फुटबल खेल्ने, राति–राति वल्र्डकप हेर्ने ।’
 

उनी सुटिङ युनिटसँगै बसेर विश्वकप हेर्ने योजनामा छन् । दिनभरि नेपालको खेलाडीका रूपमा थ्री–स्टार, मनाङ, एपीएफ, आर्मी क्लबजस्ता टिमहरूको टी–सर्ट लगाउँछन् । र, बेलुका-बेलुका विश्वकपका खेलाडीले लगाउने १० नम्बर लेखेको टी–सर्ट ।

फिल्म सुटिङकै लागि उनले फुटबल तालिम लिए । तीन महिनाको तालिमपछि उनी सुटिङमा गए । त्यहाँ उनले फुटबलका नीति–नियमहरू नजिकबाट बुझ्न पाए । खनाल भन्छन्, ‘बिर्सेका केही तौर–तरिका राति हेरेको विश्वकपले सम्झाउनेछ र थप सिक्न पनि पाउनेछु ।’

परम्परागत फुटबल खेल्ने खेलाडी किन माथि उठ्न सकेनन् ? फुटबल खेलेर एउटा खेलाडी बाँच्न सक्छ कि सक्दैन ? र, अहिलेका फुटबल खेल्ने युवाले खेलमै भविष्य बनाउन सक्छन् किन सक्दैनन् ? यस्तै कथा बुनिएको छ, ‘क्याप्टेन’मा । र, नायक खनाललाई पनि फुटबलको चस्का लागेको छ । उनलाई थप सरगर्मी विश्वकपले ल्याइदिएको छ । 

युवाले लगाउने टी–सर्टप्रति उनी गर्व गर्छन् । उनको पनि टी–सर्टप्रति गहिरो लगाव छ । टी–सर्टले नेपालमा पातलिँदै गएको खेल फुटबलको ‘क्रेज’ झल्काउने उनको तर्क छ । नेपालमा पनि खेलाडीहरूलाई हौसला बढ्ने बताउँदै भन्छन्, ‘खेलाडीलाई गरेको माया हो, यस किसिमको माया राज्यले बुझ्नुपर्छ ।’

नेपालमा पनि खेलको सम्भावना छ । अहिलेका युवा–युवती खेललाई बुझ्न सक्ने भएका छन् । खेल क्षेत्रमा पनि भविष्य छ भन्नेहरू लगाव र मेहनतका साथ खेलिरहेका छन् । खनाल भन्छन्, ‘विश्वकपले खेललाई कसरी माथि उठाउने भन्ने सोच्न बाध्य पार्छ ।’

विश्वकपले फिल्म ‘क्याप्टेन’को टिमलाई फुटबलमय बनाउन सक्ने देख्छन् । पहिलो चरणको खेलले उनी उत्सुक पनि छ । सकेसम्म उनी खेल कुनै पनि नछुटाउने बताउँछन् । 

बास्केटबल खेलाडी ‘माइकल जोर्डन’लाई प्रत्यक्ष देखेका छनु, खनालले । उनी खेलाडीप्रति साह्रै भावनात्मक छन् । आफ्नो श्रद्धा ब्राजिलका खेलाडीप्रति रहेको बताउँछन् । 

अमेरिकातिर हातले खेलिने खेलमा आकर्षण बढ्दो छ । फुटबललाई त्यहाँ ‘सकर’ भनिन्छ । नायक खनाल भन्छन्, ‘कला र खेलले नै राष्ट्रलाई चिनाउने हो तर हाम्रो राज्य यसमा मौन छ ।’

हरेक देशको भाषा हुन्छ । कला र संस्कृति हुन्छन् अनि खेल पनि । नेपाली खेलाडीहरू प्रतिभाशाली छन् । जति प्रदर्शन नेपाली खेलाडीले गरेका छन्, ती आफ्नै मिहिनेतको परिणाम ठान्छन्, खनाल । उनको गुनासो छ, ‘राज्यले खेललाई थप टेवा दिने हो भने नेपाली खेलाडी खाडी मुलुकतिर पस्नुपर्दैनथ्यो ।’