बनेपा- ठेक्काको काम जिम्मा लिएर समयमा नै काम सम्पन्न नगर्ने एकजना ठेकेदारलाई जिल्ला प्रहरी कार्यालय काभ्रेले पक्राउ गरेको छ।
जिल्ला वन कार्यालय, काभ्रे मातहतको इलाका वन कार्यालय, चौबासको भवन निर्माण कार्य जिम्मा लिएर बीचमा नै अलपत्र पार्ने लालप्रसाद चौलागाईंलाई प्रहरीले पक्राउ गरेको हो। लालप्रसादले अग्रिम निर्माण सेवाका प्रोपाइटर नवीन चौलागाईबाट काम लिएर अलपत्र पारेका थिए।
चौलागाईले २०७३ वैशाख २० गते योजना सम्झौता गरेका थिए। २०७४ वैशाख १९ सम्पन्न गर्ने गरी सम्झौता गरेको उक्त काम अहिलेसम्म ६० प्रतिशत मात्रै भएको छ।
चौलागाईंलाई बुधबार कात्तिके देउरालीबाट पक्राउ गरिएको जिल्ला प्रहरी कार्यालयका प्रहरी नायब उपरीक्षक महेन्द्रप्रसाद मरासिनीले जानकारी दिए।
चौलागाई अग्रिम निर्माण सेवाका प्रोपाइटर नवीन चौलागाईबाट ठेक्का लिएका पेटी ठेकेदार भएको प्रहरीले जनाएको छ।
जिल्ला प्रशासन कार्यालय, काभ्रेपलाञ्चोकले जिल्लामा ठेक्का सम्झौता गरी समयमा नै काम नगर्ने निर्माण कम्पनीका ठेकेदारको विवरण तयार गरी कारबाहीको प्रक्रिया अगाडि बढाएको प्रमुख जिल्ला अधिकारी कृष्णबहादुर राउतले बताए। रासस
प्रकाशित: Dec 31, 2017| 18:23 आइतबार, पुस १६, २०७४