काठमाडौं- सरकारले अब आउने कोरोनाविरुद्धको खोप ६० देखि ६४ वर्ष उमेर समूहकालाई लगाउने तयारी गरेको छ।
परिवार कल्याण महाशाखा निर्देशक डा. तारानाथ पोखरेलले अब नेपाल आउने खोपको पहिलो प्राथमिकता ६० देखि ६४ वर्षका व्यक्तिलाई राखिएको जानकारी दिए।
खोपका लागि भारत, चीन, अमेरिकालगायतका देशहरुमा कूटनीतिक पहल भए पनि खोप कहिले दिने भन्नेबारे जवाफ नआएको उनले बताए।
अनुरोध गरिएका देशको प्रतिक्रिया नआएसम्म कोभिशिल्डको पहिलो मात्रा लगाएका ६५ वर्षभन्दा माथिका नागरिकलाई दोस्रो मात्रा तत्कालै दिन नसकिने उनले जानकारी दिए।
पहिलो डोज खोप लगाएको १२ हप्तामा दोस्रो डोज लगाउने भनिए पनि त्यो सम्भव नभएको उनले बताए।
‘जेष्ठ नागरिकहरुले पहिलो मात्रा खोप लगाएको ११ हप्ता नाघिसकेको छ, १२ हप्ताभित्र लगाउनपर्ने तर तत्काल खोपको आउने निक्र्योल नभएकाले केही पर जाने देखिएको छ’, डा. पोखरलेलले भने।
एस्ट्राजेनेकाले उत्पादन गरेका अन्य खोप पनि कोभिशिल्डकै प्रकृतिको रहेकाले कोभिशिल्ड नपाए पनि एक्ट्राजेनेकाको अन्य खोप लगाउन मिल्ने उनले बताए।