आजका अखबारः फुटबल महाकुम्भदेखि टिपर आतंकसम्म

काठमाडौं- राजधानीबाट प्रकाशित बिहीबारका सबैजसो राष्ट्रिय दैनिक पत्रिकाहरुले आजबाट सुरु हुन लागेको विश्वकप फुटवल प्रतियोगितासंग सम्बन्धित विषयलाई मुख्य समाचार बनाएका छन् । 

चार वर्ष लामो प्रतिक्षा समाप्त गर्दै बिहीबारबाट रुसमा विश्वकप फुटवलको २१ औं संस्करण सुरु हुँदैछ । रुसमा पहिलोपटक हुन लागेको विश्वकपमा ३२ देश सहभागी हुँदैछ भने ६४ खेल हुने छ । प्रतियोगितमा ७३६ खेलाडी सहभागी हुनेछन् । 

यो विषयलाई आजको कान्तिपुर दैनिकले मुख्य समाचारका रुपमा आजदेखि फुटवल महाकुम्भ शीर्षक दिएर छापेको छ भने नागरिक दैनिकले विश्वकप आजदेखि शीर्षकमा पहिलो खबर लेखेको छ । अन्नपूर्ण पोस्ट् नयाँ पत्रिका, राजधानी दैनिक लगायतका अखबारले पनि यसै विषयलाई प्राथमिकता दिएका छन् । 

विश्वकप फुटवल बाहेक आजका पत्रपत्रिकाले ट्रिपर अतंकको विषयलाई पनि प्राथमिकतामा पारेका छन् । कान्तिपुर दैनिकले रकिएन ट्रिपर आतंक शीर्षक दिएर खबर लेखेको छ भने अन्नपूर्ण पोस्ट्ले सडकमा ट्रिपर आतंक शीर्षकमा खबर छापेको छ ।

यस्तै, २ सय ८६ गाउँ पहिरोको उच्च जोखिममा रहेको, गैरसरकारी संस्थामा कार्यरत पदाधिकारी र कर्मचारीले अनिवार्य रुपमा सम्पति विवरण बुझाउनु पर्ने, एकै महिनामा १ अर्बको बिजुली चोरी हुने गरेको लगातका विषयलाई पनि आजका दैनिक अखबारले महत्वका साथ प्रकाशित गरेका छन् । 

२१ औँ विश्वकप आजदेखि स् ३२ देश, ६४ खेल र ७३६ खेलाडी

विश्व फुटबलको महाकुम्भ बिहीबार रसियाको मस्कोमा सुरु हुँदैछ। विश्वकप फुटबलको २१औं संस्करणमा ३२ देश सहभागी छन्। सहभागी देशले लिग कम नकआउटका आधारमा प्रतिस्पर्धा गर्नेछन् ।

सहभागी टोलीलाई ८ समूहमा विभाजन गरिएको छ। एक महिना (जुलाई १५ सम्म) चल्ने प्रतियोगितामा कुल ६४ खेल हुनेछन् । विश्वकपमा युरोपबाट आयोजक रसियासहित बेल्जियम, जर्मनी, इङ्ल्यान्ड, स्पेन, पोल्यान्ड, आइसल्यान्ड, सर्बिया, फ्रान्स, पोर्चुगल, स्विट्जरल्यान्ड, क्रोएसिया, स्विडेन र डेनमार्क गरि १४ देश सहभागी छन् ।

एसियाबाट इरान, दक्षिण कोरिया, जापान, साउदी अरेबिया र अस्ट्रेलिया तथा अफ्रिकाबाट नाइजेरिया, इजिप्ट, सेनेगल, ट्युनिसिया र मोरक्कोले प्रतिस्पर्धा गर्दैछन्।

उत्तर अमेरिकाबाट मेक्सिको, कोस्टारिका र पनामा तथा दक्षिण अमेरिकाबाट ब्राजिल, उरुग्वे, अर्जेन्टिना, कोलम्बिया र पेरुले प्रतिस्पर्धा गर्दैछन् ।

विश्वकपमा कुल ७ सय ३६ जना खेलाडी सहभागी हुँदैछन्। तीमध्ये युरोपेली फुटबल क्लबहरूबाट व्यावसायिक फुटबल खेल्ने खेलाडी ५ सय ४४ जना छन् । अन्नपूर्ण पोस्ट्मा प्रकाशित खबर अनुसार यो कुल खेलाडी संख्याको ७४ प्रतिशत हो ।

बेलायती फुटबल क्लबहरूबाट व्यावसायिक फुटबल खेल्ने १ सय ३२ जना खेलाडी आ–आफ्नो राष्ट्रको प्रतिनिधित्व गर्दै विश्वकपमा सहभागी हुँदैछन् ।