काठमाडौं- १४ औं संस्करणको इन्डियन प्रिमियर लिग आईपीएल क्रिकेटका बाँकी खेल युनाईटेड अरब इमिरेट्स (यूएई) मा हुने भएका छन्। इन्डियन क्रिकेट कन्ट्रोल बोर्ड (बीसीसीआई)ले बाँकी खेल आउँदो सेम्टेम्बर–अक्टोबरमा यूएईमा गर्ने बताएको हो।
आईपीएलको बाँकी खेलका लागि बीसीसीआईको विशेष संयन्त्रको आज (शनिबार) बसेको भर्चुअल बैठकले निर्णय लिएको हो। त्यस्तै बीसीसीआईले अन्तर्राष्ट्रिय क्रिकेट काउन्सिल (आईसीसी) बाट पनि समय व्यवस्थापनबारे सहयोगको अपेक्षा गरेको छ।
आईसीसीले पनि सोही समयमा क्रिकेट टी–२० विश्वकप आयोजना गरेको छ। अबको आईपीएलका बाँकी खेल सेम्टेम्बर २० बाट सुरु गर्ने तयारी थालेको हो। आज शनिबार जारी गरेको प्रेस विज्ञप्तिमा इन्डियामा मनसुन सिजन परेकाले प्रतियोगिता युएईमा गर्ने लेखिएको छ। सेम्टेम्बरमा आईपीएल सुरु गर्दा बीसीसीआईले केही समस्या भने भोग्नुपर्ने छ।
अब इन्डियाले इङ्ल्याण्डसँग खेल्ने पाँच खेलको टेस्ट सिरिज सेम्टेम्बर १४ मा सकिँदैछ। त्यसको एक हप्तापछि इङ्ल्याण्डको टिम बंगलादेश प्रस्थान गर्नेछ। र, सेतो बलको खेलमा पाकिस्तान पनि जानेछ। यता क्यारेबियन प्रिमियर लिग पनि अगस्ट २८ बाट सेप्टेम्बर १९ सम्म आयोजना हुँदैछ।