भारतबाट ल्याएको केराको मूल्य कैलाली पुग्दा दोब्बर

धनगढी- भारतमा उत्पादित केरा आयातमा रोक लगाइए पनि कैलालीका उपभोक्ताले भने महंगो मुल्य तिरेर भारतीय केरा नै उपभोग गर्नु परेको छ ।

स्थानीय केरा उत्पादक किसानहरुले कैलालीमा उत्पादित केरालाई प्रोत्साहन गर्ने भन्दै भारतबाट केरा आयातमा रोक लगाए पनि उपभोक्ता भने भारतीय केरा नै उपभोग गर्न बाध्य छन् ।  

गौरीफन्टा नाकाबाट केरा आयातमा रोक लगाए पनि रुपडिया नाकाबाट नेपाल भित्रिने केरा नै कैलालीका उपभोक्ताले उपभोग गर्नु परिरहेको छ ।

केरा उत्पादक किसानहरुले कैलाली केरामा आत्मनिर्भर छ भने पनि माग अनुसार उत्पादन गर्न नसक्दा भारतमा उत्पादित केरा नै नेपाली बजारमा भित्र्याउनु परेको हो ।
किसानको पटक पटकको माग पछि प्लान्ट क्वारेन्टाइन कार्यालय धनगढीले गत बर्षको असोजबाट भारतीय केराको आयातमा रोक लगाएको थियो ।

नजिकको गौरीफन्टा नाकाबाट केरा आयातमा रोक लगाएपछि रुपडिया नाका हुँदै नेपालगन्ज भएर धनगढी पुग्ने केराको मुल्य दुई गुणा महंगो छ । रुपडिया नाकाबाट कैलाली भित्रिने केरा उपभोक्ताले प्रति दर्जन ९० रुपैँया सम्म तिर्नुपरेको छ । जबकी गौरीफन्टा नाका भएर आउँदा उक्त मुल्य ५० देखि ५५ रुपैँया पर्ने गरेको केरा व्यापारीहरु बताउछन् ।

गौरीफन्टा नाकाबाट केरा आयातमा रोक लगाए पनि नेपाली किसानले आवश्यकता अनुसार केरा उत्पादन गर्न  रुपडिया नाकाबाट भारतीय व्यपारीले नै कैलाली ल्याउने गरेको थोक बिक्रेताहरु बताउछन् । बजारमा प्रत्येक दिन हजारौं टन केराको माग बढेकाले बेला थोक व्यापारीले ढुवानी, चिस्यान लगायतले मुल्य बढेको बताएका छन् । थोक व्यापारीका अनुसार लामो यात्रामा केरा ल्याउँदा केराको गुणस्तर समेत घटेको छ ।

टीकापुरमा केरा उत्पादन गर्दै आएका रामबहादुर कुँवरले गौरीफन्टा नाकाबाट केरा नेपाल भित्रिदा कैलालीमा उत्पादित केरा भन्दा प्रतिदर्जन १२ देखि १५ रुपैँया सम्म सस्तो पर्दा स्थानीय केरा बिक्रि नहुने गरेको बताए ।

आर्थिक बर्ष २०७३/०७४ मा मात्रै गौरीफन्टा नाकाबाट एक हजार छ सय ८९ मेट्रिक्टन केरा कैलाली भित्रिएको थियो । चालग आर्थिक बर्षको दुई महिनामा मात्रै चार सय ४४ टन केरा कैलाली भित्रिएको छ ।

'केराको माग अत्याधिक छ, तर नेपालमा केरा छन,  उपभोक्ताको माग अनुसार नै रुपडिया नाकाबाट केरा ल्याउनु परेको छ' जय श्री बासुलिङ ट्रेड एण्ड सप्लायर्सका सञ्चालक महादेव भट्टले भने-'नेपालमा सिजन अनुसार मात्रै केरा उत्पादन हुन्छ त्यसैले भारतबाट केरा ल्याउनै पर्दछ ।'

नजिकको नाकाबाट बन्द गरेर टाढाको नाकाबाट ल्याउनुपर्दा उपभोक्ता महंगो मुल्यमा किन्न बाध्य भएको उनको भनाई छ ।

जिल्ला कृषि विकास कार्यालयका अनुसार कैलालीमा दुई सयभ ५० भन्दा बढी कृषक केरा खेतीमा छन् । करिव सात सय ५० हेक्टर क्षेत्रफलमा केरा खेती गरिन्छ ।

कैलालीमा उत्पादन हुने केरा सुदूरपश्चिमका नौ वटै जिल्ला र दाङ, सुर्खेतलगायत जिल्लामा निर्यात हुने गरेको छ । झण्डै आठ लाख जनसंख्या रहेको कैलाली जिल्लामा बार्षिक ६४ हजार मेट्रिकटन तरकारी तथा फलफूलको आवश्यकता पर्दछ ।

कैलाली जिल्लामा चालु आर्थिक बर्ष २०७४/०७५ मा करिव १० हजार आठ सय मेट्रिक्टन केरा उत्पादन भएको छ ।

गत आर्थिक बर्ष २०७३/०७४ को तुलनामा यो आर्थिक बर्ष केरा उत्पादन बढेको छ । गत बर्ष ७ सय ३५ हेक्टर जमिनमा नौ हजार नौ सय सय २२ मे«िटक्टन उत्पादन भएको थियो ।

तराईको भुभागमा उन्नत जातको केरा उत्पादन बढेसंगै पहाडी गाउँपालिका महोन्याल र चुरेमा स्थानीय केराको उत्पादन पनि बढेको तथ्यांकले देखाएको छ ।