सर्पको डसाईले मृत्यु भएकी पार्वतीको शब उत्खनन् गर्दै प्रहरी  

धनगढी।    महिनावारी बार्न छाउपडी गोठमा सुतेको बेला सर्पले डसेर ज्यान गुमाएकी पार्वती बुढाको शव प्रहरीले उत्खनन् गर्ने भएको छ । पोष्टमाटम नै नगरेर शव गाडिएकोले पोष्टमाटम गर्नका लागि शव उत्खनन् गर्न लागिएको जिल्ला प्रहरी प्रमुख प्रहरी नायव उपरीक्षक राकेश तण्डुकारले जानाकरी दिए । 

प्राकृतिक मृत्यु वाहेकका घट्नामा अनिवार्य पोष्टमाटम गर्नुपर्ने कानुनी व्यवस्था भएकाले शव उत्खनन् गर्न लागिएको उनले जानकरी दिए । शव उत्खनन्का लागि प्रहरीको टोली शव स्थलमा पुगिसकेको छ । शवलाई पोष्टमाटमका लागि जिल्ला अस्पताल मंगलसेन ल्याईने प्रहरीले जानकारी दिएको छ । 

अछामको तुर्माखाद गाउपालिका(४ जुया गाउकी १८ वर्षीया पार्वतीको शनिवार राति छाउपडी गोठमा सर्पले डसेर ज्यान गएको थियो । आफन्तले पोष्टमार्टम नै नगरी शव गाडेका थिए । प्रहरीले खवर पाउँदा  शव पोष्टमाटम गर्नुपर्ने भएकाले गाउलेले छाउ गोठमा नभइ घरमै सर्पले डसेर मृत्यु भएको भनेर सल्लाह गरेर घट्ना ढाकछोप गरेका थिए । 
नेपाल समयले छाउगोठमै मृत्यु भएको भनि समाचार प्रकाशित गरेपछि प्रहरी प्रधान कार्यालयले जिल्ला प्रहरीलाई घट्ना बारे बुझ्न टोली घट्नास्थल पठाउन लगाएको थियो । अछाममा छाउपडी गोठमा हाल सम्म थुप्रै किशोरी तथा महिलाले ज्यान गुमाए पनि अधिकांशको शव पोष्टमाटम नगरेरै दाहासस्कार गर्ने गरिन्थ्यो । पार्वतीको शव उत्खनन् गरेर पोष्टमाटम गरेपछि छाउपडी कुप्रथा बार्ने र बार्न लगाउने प्रचलनमा कमि आउने यसका अभियान्ताहरुले विस्वास लिएका छन् । छाउपडी गोठमा ज्यान गुमाएकी महिलाको खाल्डोबाट शव निकालेर पोष्टमाटम गरेको यो नै पहिलो घट्ना हो ।