वीरगंज- जिल्ला प्रहरी कार्यालय पर्साले हुण्डी कारोबार गरेको आरोपमा ५३ लाख ८० हजार रूपैयाँसहित २ जनालाई पक्राउ गरेको छ।
पक्राउ पर्नेमा वीरगञ्ज महानगरपालिका- ११ श्रीपुर बस्ने १९ वर्षीय प्रकाश जैसवाल र पानीटंकी ८ का शिव आनन्द गुप्ता छन्।
बिहीबार दिउँसो प्रकाश जैसवालले कालो झोला बोकी हिँडिरहेको अवस्थामा श्रीपुरबाट नियन्त्रणमा लिई खनतलासी गर्दा झोलाबाट २४ लाख रूपैयाँ र बाराको प्रसौनी गाउँपालिका– ६ का शिव आनन्द गुप्ताको पानीटंकीस्थित डेरामा खानतलासी गर्दा अन्य दुईवटा झोलामा राखिएको २९ लाख ८० हजार रूपैयाँ गरी ५३ लाख ८० हजार रूपैयाँ बरामद गरेको हो।
दुवै जनालाई नियन्त्रणमा लिई पर्सा प्रहरीले बैंक तथा वित्तीय संस्थासम्बन्धी ऐन, २०७३ विरुद्धको कसुरमा अनुसन्धान प्रक्रिया अगाडि बढाइएको पर्साका प्रहरी नायव उपरीक्षक ओमप्रकाश खनालले बताए।