सुदूरपश्चिमका पूर्वप्रदेश प्रमुख मल्लको निधन

काठमाडौं - सुदूरपश्चिम प्रदेशका पूर्व प्रदेश प्रमुख मोहनराज मल्लको निधन भएको छ।

लामो समयदेखि निमोनियाबाट ग्रस्त मल्लको उपकारका क्रममा काठमाडौस्थित निदान अस्पतालमा आज बिहान ७ बजे निधन भएको मल्लका तत्कालीन स्वकीय सचिव धनसिंह साउदले जानकारी दिए। 

मल्ल राष्ट्रिय पञ्चायत सदस्य हुँदै नेपाली कांग्रेसका महासमिति सदस्यसमेत भएका थिए। उनी २०३७ देखि २०४६ सम्म राष्ट्रिय पञ्चायत सदस्य भएका थिए। 

मल्ल २०२८ सालमा डोटी बोगटानअन्तर्गत पन्डौंन गाउँ पञ्चायतको प्रधानपञ्च, २०३२ सालमा कैलाली जिल्ला पञ्चायतको उपसभापति, २०४५ सालमा टीकापुर विकास समितिको अध्यक्ष, २०५२ सालमा परराष्ट्र मन्त्रालयको सल्लाहाकार र त्रिभुवन विश्व विद्यालयको सभासद भएका थिए। 

२०७० सालको दोस्रो संविधानसभा अघि उनी नेपाली कांग्रेसमा प्रवेश गरेका थिए। भजनी नगरपालिका निवासी मल्लका १ छोरा र १ छोरी छन्।