काठमाडौं- नेकपा एमालेका नेताद्वय योगेश भट्टराई र गोकर्ण विष्ट माधव नेपाल समूहमै फिर्ता भएका छन्। बुधबार माधवकुमार नेपाल-झलनाथ खनाल पक्षका १५ स्थायी कमिटी सदस्यले जारी गरेको विज्ञप्तिमा उनीहरूको समेत नामसमेत उल्लेख छ।
भट्टराईले केही दिनअघि विपक्षी गठबन्धनका तर्फबाट प्रधानमन्त्रीमा शेरबहादुर देउवालाई गरिएको प्रस्तावमा हस्ताक्षर गरेका थिएनन्। यसपछि फेसबुकमा उनले आफूले हस्ताक्षर नगरेर ठीक गरेको प्रतीकात्मक स्टाटस लेखेका थिए। उनले सर्वोच्चमा विपक्षी गठबन्धनले दायर गरेको रिटमा पनि हस्ताक्षर गरेका थिएनन्।
‘नेकपा एमालेको एकतालाई जोगाउन सकिन्छ कि भन्ने आशाले मैले आजको निर्णय लिएको हुँ। सही गरेँ कि गलत गरेँ, इतिहासको कठोर मूल्यांकनमा खडा छु,’ शुक्रबार सामाजिक सञ्जालमा लेखेका थिए। यसपछि उनी ओली पक्षमा लागेको विश्लेषण गर्न थालिएको थियो।
गोकर्ण विष्टले देउवालाई प्रधानमन्त्री बनाउने प्रस्तावमा हस्ताक्षर गरेपनि सर्वोच्च अदालतमा विपक्षी गठबन्धनका तर्फबाट रिट दायर गर्दा हस्ताक्षर गरेका थिएनन्। पछिल्लो समय यी दुवै नेता ओली पक्षमा खुलेको भन्दै विश्लेषण गर्न थालिएको थियो।
प्रधानमन्त्री केपी शर्माको सिफारिसमा जेठ ८ गते राती करिब पौने २ बजे राष्ट्रपति विद्यादेवी भण्डारीले प्रतिनिधि सभा विघटन गरेकी थिइन्। यसपछि नेकपा एमालेको नेपाल पक्षसहितको विपक्षी गठबन्धनले विरोध गर्दै आएको छ।