काठमाडौं- नायक विपिन कार्कीलाई विश्वकपभरि सुटिङ नपरिदिए हुन्थ्यो भन्ने लागेको छ । सुटिङ हापेर भए पनि उनी सबै खेल हेर्ने योजनामा छन् ।
फुटबलका पारखीहरू माझ विश्वकप तात्तातो चिया, कफीझैं बनेको छ । कार्की पनि आम पारखीभन्दा फरक छैनन् । भन्छन्, ‘खेलको माध्यमबाट राष्ट्र चिनिन्छ र त्यस राष्ट्रप्रति हेर्ने दृष्टिकोण बदलिन सक्छ ।’
उनको भनाइमा हरेक जितले सम्बन्धित मुलुक र त्यसको फुटबल टोलीप्रति आम मानिसको दृष्टि फेरिदिन्छ । चार वर्षमा आउने विश्वकपले यस्तै यथार्थ बोकेको लाग्छ, कार्कीलाई ।
विश्वकप खेल्न आतुर खेलाडीझैं उनीहरूका ‘फ्यान’ पनि खेल हेर्न हतारिएका छन् । कार्की पनि त्यस्तै हतारोमा छन् ।
‘टी–सर्ट लगाएर खेलाडीको प्रतिनिधित्व हुँदैन, त्यसैले किनेको छैन’
नायक कार्की अहिले चलचित्र ‘प्रसाद’को तयारीमा छन् । फिल्मको ‘स्क्रिप्ट’ पढिरहँदा उनलाई विश्वकपको ज्वरोले समातिसकेको छ । फिल्ममा आफ्नो ‘क्यारेक्टर’ बलियो तयारीमा लागेका छन्, उनी । विश्वकप छुट्छ कि भन्ने चिन्ता पनि छ, मनमा । भन्छन्, ‘विश्वकप छुटाउनै नहुने खेल हो ।’
हरेक फुटबल फ्यानलाई विश्वकप अवधिभर कसैले बसेको ठाउँबाट पनि नउठाइदेओस्जस्तो लाग्छ । कसैले काम पनि हत्तपत्त नअह्राइदेओस्जस्तो लाग्छ । कार्कीलाई पनि त्यस्तै लागिरहेको छ ।
चार वर्षमा धेरै परिवर्तन हुने भएकाले कुन देशका खेलाडीले कति खेल्न सक्छन् भन्ने हेरेपछि मात्रै बताउन सकिने उनी बताउँछन् । यसपटक इजिप्टको खेल हेर्न उत्सुक छन् । त्यसैले उनको समर्थन इजिप्टका खेलाडीहरूलाई छ । उक्त टिमका खेलाडीले राम्रो प्रदर्शन गर्ने उनको आशा छ ।
समूह ‘ए’को बलियो टोली इजिप्ट सन् १९९० पछि पहिलोपटक चयन भएको छ । इजिप्टले अफ्रिकी फुटबलमा उत्कृष्ट प्रदर्शन गरेको थियो । आफू अभिनयमा नयाँ–नयाँ ‘क्यारेक्टर’का साथ स्क्रिनमा देखिएजस्तै खेलाडी पनि नयाँ आएमा खेलमा नौलोपन देखिने कार्कीको बुझाइ छ ।
राम्रो खेलाडीप्रति आदर र ‘रफ’ खेलाडीप्रति फ्यानको वितृष्णा जाग्न सक्ने उनलाई लाग्छ ।
अनमोल केसीको अभिनय रहने फिल्म ‘क्याप्टन’ सुटिङको क्रममा छ, जसको कथा फुटबल खेलमाथि छ । नेपालमा पछिल्लो समय खेलहरू माथि फिल्म बन्दैछन् । नेपालको राष्ट्रिय खेल डण्डीबियोमाथि ‘डमरुको डण्डीबियो’ बन्यो ।
विश्वको ध्यान खिचिरहेको वल्र्डकप एक्लै बसेर हेर्दा मज्जा लाग्दैन, कार्कीलाई । भन्छन्, ‘ग्यादरिङमा हेर्नुको मजा छुट्टै हुन्छ ।’ त्यस्तै माहोलमा विश्वकप हेर्ने योजना बनाउँदैछन्, उनी ।
समूहमा बसेर खेलाडी र खेलको मूल्यांकन गर्नु थप मज्जा हुने उनी बताउँछन् । भन्छन्, ‘त्यसरी हेर्दा खेल र खेलाडीप्रतिको दृष्टिकोण क्लियर हुन्छ ।’
शायद विश्वकपमा उत्कृष्ट खेलाडीको मात्रै नाम हुन्छ । राम्रो प्रदर्शन गर्ने खेलाडीकै ‘फ्यान’ बढी हुन्छन् । फुटबलमा लगाव रहेका खेलाडी संसारभर धेरै छन् । ती सबैको नाम आम मानिसलाई जानकारीसम्म हुँदैन । सबैले आम मानिसबीच आफूलाई परिचित बनाउन सक्छन् भन्ने पनि छैन ।
‘१/२ खेलाडी मन पराएर पूरै खेलप्रतिको दृष्टिकोण बनाउन सकिँदैन,’ कार्की भन्छन्, ‘टी–सर्ट लगाएर खेलाडीको प्रतिनिधित्व हुँदैन, त्यसैले टी–सर्ट किनेको छैन ।’
शायद उनको विश्लेषण सही हो । खेल मैदानमा देखिने हो र त्यसमा हारजित हुन्छ नै । तर, कसले कतिखेर गोल हान्छ भन्ने खेल नसकिन्जेल थाहा हुँदैन ।
त्यसैले नायक कार्की विश्वकप छुटाउन चाहँदैनन् । निर्देशक/निर्मातालाई खेल अवधिभर सुटिङ नपारिदिन अनुरोध गर्ने सोचमा छन् । उनीहरूले सुटिङ रोक्न नचाहेको खण्डमा विकल्प खोज्ने बताउँछन् । भन्छन्, ‘सेमी–फाइनल र फाइनलचाहीं सुटिङ हापेर भए पनि हेरिन्छ ।’
प्रकाशित: Dec 31, 2017| 18:23 आइतबार, पुस १६, २०७४