काठमाडौं- २७ जेठमा सरकारले नेपाल प्रहरीमा प्रशासनतर्फका अतिरिक्त महानिरीक्षक (एआईजी)को दरबन्दी घटाएर तीन वटामा सीमित बनाएको छ । त्यसका लागि प्रतिस्पर्धामा छन्, नौ जना डीआईजीहरू ।
२९ माघ ०४६ मा प्रहरी निरीक्षक बनेका डीआईजीहरूमध्ये रमेश खरेलले आईजीपी नियुक्तिमा असन्तुष्टी जनाउँदै राजिनामा दिइसकेका छन् । पुष्कर कार्की, उत्तम कार्की, मनोज न्यौपाने, धिरु बस्नेत, सुरेशविक्रम शाह, पवनप्रसाद खरेल, छविलाल जोशी, ज्ञानविक्रम शाह र शरद चन्द एआईजीको प्रतिस्पर्धामा छन् ।
उनीहरूमध्ये उत्तम, छविलाल, ज्ञानविक्रम, शरद र पवनप्रसाद ३० असार ०४५ मा प्रहरी निरीक्षक बनेका अधिकृतहरू हुन् । पाँचै जनाले अगामी ३० असारमा ३० वर्षे सेवा अवधि पूरा गरेर अवकाश पाउँदैछन् ।
गृह सचिव प्रेमकुमार राई र प्रहरी महानिरीक्षक सर्वेन्द्र खनाल दुवै एक महिनापछि अवकाशमा जाने उनीहरूलाई एआईजी नबनाउने मनस्थितिमा रहेको स्रोतले जनाएको छ । सोही कारण उनीहरू अवकाशमा गएपछि मात्र एआईजी बढुवाको सिफारिस गर्ने सम्भावना रहेको स्रोतको दाबी छ ।
प्रकाशित: Dec 31, 2017| 18:23 आइतबार, पुस १६, २०७४