काठमाडौं- नेपाल कम्युनिस्ट पार्टीका नेता भीम रावलले अध्यक्ष केपी शर्मा ओली पक्षले आफूहरूलाई कारबाही गर्नु हास्यास्पद भएको टिप्पणी गरेका छन्। सोमबार साँझ ट्विट गर्दै नेता रावलले आफूहरूमाथिको कारबाही ओली गुटको फुटावादको निरन्तरता भएको समेत टिप्पणी गरेका हुन्।
ओली पक्षले पार्टी विधान मिच्दै मनपरी गर्ने, संविधान उल्लङ्घन गर्ने, देशको अस्मिता र अस्तित्वमा आघात पार्ने नागरिकता वितरणलगायतका राष्ट्रघाती कुकृत्य गरेकोसमेत नेता रावलको आरोप छ।
'देशलाई अस्तव्यस्त बनाउने केपी गुटले हामीलाई पार्टी सदस्यबाट निष्कासित गरियो भन्नु हास्यास्पद छ। यो केपी गुटको फुटवादकै निरन्तरता हो,' रावलको ट्विटमा उल्लेख छ।
— Dr. Bhim Rawal (@BhimRawal179) May 24, 2021
सोमबार नै ओली पक्षले वरिष्ठ नेताद्वय झलनाथ खनाल, माधवकुमार नेपाल र भीम रावलसहित विघटित प्रतिनिधिसभाका ११ जना सांसद पार्टीको साधारण सदस्यसमेत नरहने गरी निष्कासन गरेको थियो।
ओली पक्षले रामकुमारी झाँक्री, मुकुन्द न्यौपाने, कलिला खातुन, सरला यादव, पुष्पाकुमारी कर्ण, निरादेवी जैरु, पुष्पा कर्ण कायस्थ र कल्याणी खड्कालाई पनि निष्काशन गरेको छ।
स्थायी कमिटी बैठकले १२ जना सांसदलाई भने स्थायी कमिटी बैठकले २४ घण्टे स्पष्टीकरण सोध्ने निर्णय गरेको छ। सर्वोच्च अदालतमा रिट हाल्न हस्ताक्षर गर्ने सांसदलाई पार्टीले अल्टिमेटम दिएको हो।
ती सांसदहरू हुन्- विरोध खतिवडा, जीवनराम श्रेष्ठ, घनश्याम भुसाल, सोमप्रसाद पाण्डे, कृष्णलाल महर्जन, झपट रावल, भवानी प्रसाद खापुङ, यज्ञ सुनुवार, सुरेन्द्र पाण्डे, मेटमणि चौधरी, दिपक प्रकाश भट्ट र नारायण खतिवडा।