काठमाडौं– नेकपा (एमाले)का वरिष्ठ नेताद्वय झलनाथ खनाल र माधवकुमार नेपाल पार्टीबाट निष्कासित भएका छन्।
अध्यक्ष केपी ओलीको अध्यक्षतामा आज सोमबार बालुवाटारमा बसेको स्थायी कमिटी बैठकले खनाल र नेपाललाई साधारण सदस्यसमेत नरहने गरी पार्टीबाट निष्कासन गर्ने निर्णय गरेको हो। बैठकले खनाल र नेपालसहित विघटित प्रतिनिधिसभाका ११ जना सांसदलाई पनि निष्कासन गरेको छ।
अस्ति शनिबार अध्यक्ष ओलीले खनाल, नेपाल, भीम रावलसहित ११ जनालाई स्पष्टीकरण सोधेका थिए। उनीहरु कसैले पनि स्पष्टीकरणको जवाफ नदिएपछि आज निष्कासित भएका हुन्।
निष्कासनमा पर्नेमा समानुपातिकबाट सांसद बनेका रामकुमारी झाँक्री, मुकुन्द न्यौपाने, कलिला खातुन, सरला यादव, पुष्पाकुमारी कर्ण, निरादेवी जैरु, पुष्पा कर्ण कायस्थ र कल्याणी खड्का पनि छन्।
स्थायी कमिटी बैठकले १२ जना सांसदलाई भने स्थायी कमिटी बैठकले २४ घण्टे स्पष्टीकरण सोध्ने निर्णय गरेको छ। आज सर्वोच्च अदालतमा रिट हाल्न हस्ताक्षर गर्ने सांसदलाई पार्टीले अल्टिमेटम दिएको हो।
ती सांसदहरू हुन्- विरोध खतिवडा, जीवनराम श्रेष्ठ, घनश्याम भुसाल, सोमप्रसाद पाण्डे, कृष्णलाल महर्जन, झपट रावल, भवानी प्रसाद खापुङ, यज्ञ सुनुवार, सुरेन्द्र पाण्डे, मेटमणि चौधरी, दिपक प्रकाश भट्ट र नारायण खतिवडा।