जनकपुरधाम- सप्तरीमा ५० वर्षीय रामदल यादवलाई कुटपिट गरी हत्या गरेको आरोपमा चार जना पक्राउ परेका छन्। रुपनी गाउँपालिका-१ का यादवलाई चारै जनाले मिलेर कुटपिट गरी हत्या गरेको आरोपमा पक्राउ गरिएको जिल्ला प्रहरी कार्यालय सप्तरीका प्रवक्ता प्रहरी नायव उपरीक्षक माधवप्रसाद काफ्लेले जानकारी दिए।
पक्राउ पर्नेमा सप्तरीको रुपनी गाउँपालिका-१ रायपुरका ३० वर्षीय विनय यादव, ३० वर्षीय मनोज कुमार यादव, २४ वर्षीय मुकेश कुमार यादव र वडा नम्बर ५ का ३१ वर्षीय महेश कुमार पासवान छन्।
चारै जनाले रामदललाई भुईंमा लछारपछार गरी खुकरीले टाउकोमा प्रहार गरी गम्भिर घाइते बनाएका थिए। उपचारका क्रममा विराटनगरस्थित गोल्डेन अस्पतालमा रामदलको सोमबार मृत्यु भएको थियो।
रामदलको मृत्युपश्चात् पक्राउ परेका चारै जना माथि जिल्ला प्रहरी कार्यालय सप्तरीमा ज्यान मार्ने उद्योगको मुद्दा दर्ता गरी थप अनुसन्धान थालिएको प्रवक्ता काफ्लेले जानकारी दिए।